LAMBERTO G. CEBALLOS
Sitio Panaghiusa, Basak-San Nicolas, Cebu City
Naghiwasa si Madam Bella sa iyang kama niining gabhiona. Naghigwaos ang iyang galamhan sa usa ka talagsaong pagbati nga kapin na sa duha ka tuig nga wala niya masinati. Tungang gabii na, apan wala siya batiag katulugon. Mipasunding sa iyang handurawan ang bayhon ni Dante, iyang drayber, samtang kini naghugas sa lawas sa iyang awto kaganihang buntag. Nag-shorts lang si Dante ug walay sapot ang ibabaw nga lawas niini. Bus-ok og lawas si Dante bisan singkuwenta na ang iyang edad. Sa iyang bahin, si Madam Bella sinkuwenta y tres na, apan nagpabilin ang kabigot sa iyang lawas. Duha na ka tuig kapin siyang nabiyuda sa iyang kanhi bana nga si Dario. Kaganihang buntag diha siya sa bentana sa iyang lawak, nagpasalipod sa kurtina sa dyalusi ug nanil-ip kang Dante. Nabati gani niya nga may lahing dinagaang sa pagbati nga mikuyanap sa iyang tibuok galamhan. May kahaw-ang nga gibilin si Dario sa iyang kinabuhi nga kinahanglan hulipan. Sumala sa iyang nahibaw-an gikan mismo ni Dante, biyudo kini. May bugtong anak babaye kini nga naminyo og drayber nga taga Davao ug tua na sa Davao sila manimuyo. Sa iyang bahin, si Madam Bella may duha ka anak lalaki nga pulos na usab minyo ug nanaglain pagpuyo. Ang usa maestro ug atua sa Dakbayan sa Talisay mopuyo kay nagtudlo sa publikong eskuylahan; ang ikaduha, mechanical engineer ug tua pod manimuyo sa Dakbayan sa Naga kay empleyado sa pabrika sa semento didto. Bahin sa panginabuhian, may tulo ka dyip pasaheroan si Madam Bella nga kabilin sa iyang bana. Usa sa mga drayber mao si Dante nga iyang gikuha nga personal drayber dihang mitaliwan ang iyang bana kay may negosyo man sab siyang ‘buy-and-sell’ sa mga alahas. Kaniadto, ang iyang bana maoy momaneho sa awto kon siya (Madam Bella) maningil na.
Kay wala man gyud siya mahikatulog bisan lawom na ang gabii, gitawgan niya si Dante sa selpon. May lawak si Dante nga kasikbit sa garahe.
“Dante, tulog na ka?” malumo ug paraygon nga pulong ni Madam Bella.
“Wa pa, Madam. Duna kay isugo?” ni Dante nga nahibulong kay karon pa mahitabo nga nanawag sa lawom nang gabii ang iyang amo.
“Labad akong ulo. Pwede ba, pahilot ko nimo? Wa nako e-lock ang pultahan sa sala.” “Okey, Madam. Mosaka na ko.”
Nagkang-a ang sira sa pultahan sa lawak ni Madam Bella. Gitulod kini ni Dante ug maoy misugat sa iyang mga mata ang nagbuy-od nga lawas ni Madam Bella didto sa kama, nagsul-ob sa nipis kaayong sapot pangkatulog. Nakasabot siya sa tuyo sa iyang amo. Bisag bugnaw ang lawak tungod sa aircon, gibati niya ang kalit nga pagpanginit sa iyang kalawasan. Gisirhan niya ang pultahan ug gihukas ang iyang mga sapot. Ug miduol siya kang Madam Bella nga kalit migakos kaniya.
“Giuhaw ko, Dante! Tagbawa ang akong kauhaw!” tuaw ni Madam Bella.
“Sama ang atong gibati, Madam! Giuhaw sab ko!” ni Dante nga migakos kang Madam Bella. Nag-abot ang ilang mga ngabil nga pulos giuhaw sa gugma.
Unya misapod ang kahilom sa lawak gawas sa mga hinagawhaw ug inagutnga nilang Madam Bella ug Dante bahin sa kalalim sa ilang gibati.
“Dante, I love you!” ni Madam Bella. “Please, love me, too!”
“Dugay na kong naibog ug nahigugma nimo, Madam. Bisan niadtong buhi pa si Sir Dario. Bisan sa imong edad, sexy ug maanyag gihapon ka. Higugmaon tika hangtod sa akong kamatayon!” ni Dante.
“Salamat, Dante! Ug ayaw na kog tawgag Madam. Bella na lang,” ni Madam Bella nga mihugot paggakos kang Dante samtang nagpadayon ang ilang pagminahalay ibabaw sa kama.
“Ikaw ang masunod, Bella!” ni Dante nga migakos na sab sa lumoy nga lawas ni Madam Bella. (KATAPUSAN)