Nadakpan sa Parian Police Station sa Cebu City Police Office (CCPO) ang 41 anyos nga lalaki atol sa buy-bust sa Miyerkules, Agusto 8. 2024, pasado ala 6 sa gabii, sa dalan M. Lazarte, Barangay Parian, Dakbayan sa Sugbo.
Ang dinakpan giila nga si Genyl Valencia alyas Opaw, hamtong na ang panuigon, nga nagpuyo sa maong lugar,
Nasakmitan si Valencia og mga pinakete sa gituohang shabu nga motimbang og lima ka gramos nga adunay standard drug price nga P34,000, ang gi-turnover sa PNP Forensic Unit alang sa chemical analysis.
Matod ni Police Major Marvin Fegarido, hepe sa Parian police station nga base sa ilang nadawat nga kasayuran nga kasagaran sa iyang kustome ang mga bugaw nga naa sa gawas sa usa ka lodge sa dalan Colon.
Gawas sa mga bugaw ang mamalit usab kaniya ang mga babaye’ng mugbo og lupad nga gitawag ni Fegarido nga ‘Inday Hilay’ nga mogamit sila sa druga aron dili bation og kakapoy ug kauwaw kon 'makigkumbati' sa kama sa ilang kustomer.
Human madawat ang inpormasyon, gilusad dayon ang buy-bust nga niresulta sa pagkasikop sa suspek. / AYB