Makigbinukbokay si kanhi word title challenger Filipino Jonas Sultan sa iyang kanhi sparring partner nga si Katsuma Akitsugi karong Hulyo 12, 2025 (US time), sa Save Mart Arena sa Fresno, California.
Si Sultan, 33, kinsa kanhi sakop sa nabungkag nga ALA stable sa Sugbo, mobalik pag-away human sa taastaas nga panahon.
Katapusang niaway si Sultan niadtong Pebrero 24, 2024, diin napilde siya pinaagi sa 1st round knockout batok ni Riku Masuda sa Japan.
Sa preparasyon ni Sultan alang ni Masuda, si Akitsugi maoy usa sa iyang sparring partners.
Si Sultan maoy usa sa dekalidad nga Pinoy nga mga boksidor kaniadto diin siya maoy usa sa mga nakapilde pinaagi sa unanimous decision batok sa kababayang kanhi world champion nga si Johnriel Casimero.
Nisuway pag-ilog si Sultan sa bakus sa kanhi world champion nga kababayan nga si Jerwin Ancajas apan napilde pinaagi sa unanimous decision.
Si Sultan naggunit og 19-7, 11KOs nga rekord samtang si Akitsugi adunay 12-0, 3KOs nga baraha. / EKA, ESL