Gisugdan niadtong Marso 29, 2025, ang giatangang joint campaign alang sa paglansar ni Daanbantayan Mayor Sun Shimura isip kongresista.
Ning maong kalihukan, nagkatapok ang nanag-unang mga personalidad sa pulitika ug iyang supporters sa ikaupat nga distrito sa Probinsya sa Sugbo.
Ang kalihukan nga nagpatugbaw sab sa mga kandidatura nila ni Board Members Kerrie Shimura ug Hon. Icky Salazar sa Madridejos, nagpakita og panaghiusa ug hiniusang panglantaw alang sa kalambuan.
Gisugdan ang kalihukan pinaagi sa usa ka solemneng misa sa Sta. Rosa de Lima nga naghatag og pamalandong sa paglusad sa kampanya.
Human sa relihiyusong seremonya, gipahigayon ang grand caravan nga ningsubay sa mainland nga bahin sa ikaupat nga distrito nga naghatag og kahigayonan sa mga kandidato sa pagpakighimamat sa lokal nga mga residente.
Pagkagabii, nitiklop ang kalihukan sa lungsod sa San Remigio diin giindorso sa municipal mayors ang kandidatura ni Shimura sa kongreso isip pagpadayag sa ilang suporta.
Lakip sa notadong mga ningtambong mao sila si San Remigio re-electionist Mayor Al Pestolante, Medellin mayoral candidate Vice Mayor Al Lim, Tabuelan re-electionist Mayor Raul Gerona, ug Tabogon mayoral candidate Zigfred Duterte.
Nikawat sab og atensyon ang Team SUNDIGAN nga gipangulohan ni Retired Vicente Loot, kinsa nilansar isip mayor sa Daanbantayan.
Ang presensya ni Loot nagpakita og lig-ong alyansa sa mga kandidato nga nagtinguha og kalambuan sa ikaupat nga distrito.
Karon nga opisyal na ang pagsugod sa campaign period sa lokal nga mga kandidato, ang supporters ni Shimura ningpadayag sa ilang pagsalig nga adunay maayo ug dakong kausaban nga mahitabo sa ikaupat nga distrito kon mapili kini. / Tampo