Sunog miigo sa Talisay, Naga, Argao

 NAUGDAW: Mokabat sa 60 ka balay ang nangaugdaw sa sunog sa Bgry. Cansojong, Dakbayan sa Talisay sa Martes. / TAMPO ni Fire Investigator F02 Mar Dee II Auxtero, Talisay City Fire
NAUGDAW: Mokabat sa 60 ka balay ang nangaugdaw sa sunog sa Bgry. Cansojong, Dakbayan sa Talisay sa Martes. / TAMPO ni Fire Investigator F02 Mar Dee II Auxtero, Talisay City Fire

Tulo ka mga sunog niulbo sa lalawigan sa Sugbo, tag-usa sa mga dakbayan sa Talisay ug Naga ingon man sa lungsod sa Argao, sa Martes, Marso 19, 2024.

Sa Sityo Atisa, Barangay Cansojong, Talisay City, gibana-bana nga 60 ka mga balay ang gilamoy sa kayo alas sa 11:20 sa buntag.

Matod pa ni F02 Mar Dee II Auxtero, fire investigator sa Talisay City Fire Station, mokabat sa P1.5 milyunes ang gibana-banang danyos sa sunog.

Gikataho kini’ng nagsugod sa balay nga gipanag-iya ni Wilson Labuca.

Human sa paglabay sa usa ka oras, gideklarar nga hingpit nga napawong ang kayo.

Atol niining pagsuwat, wa pa matino ang hinungdan sa pag-ulbo sa kayo.

Nagpadayon pa sab pagpanglista sa mga pamilya ug indibiduwal nga apektado sa sunog.

Samtang sa dakbayan sa Naga, usa ka balay sa Purok Buntoran, Sto. Nino, Barangay Inayagan, nasunog.

Asoy ni F02 Cielo Bacus, ang balay iya ni Eduardo Catabas, kinsa giingong nagdaub ug naapil ang iyang balay sa pagkasunog. Gibana-banang P50,000 ang danyos.

Samtang usa ka poultry farm sa Sityo Pawas, Barangay Usmad, lungsod sa Argao nasunog sab ala 1:20 sa hapon, Marso 19.

Butyag ni Joel Orbeta sa Argao Command Center nga usa sa mga residente sa maong lugar nagkanayon nga nakadungog lang sila nga adunay nipaka dungan sa pagkaputol sa linya sa kuryente.

Inisyal nga nasayran nga base sa pamahayag ni Usmad barangay konsehal Narding Amarillo nga gibana-bana nga 10,000 ka mga manok ang nalitson.

Nabinlan na lang og 100 kapin kun kulang nga mga manok nga wa naapil sa pagkasunog.

Nagpadayon pa ang kabumberohan sa pag-imbestigar sa insedente.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph