LISUD ANG AGIANAN: Makita nga interior nga bahin sa Barangay Sambag 2 naigo sa sunog, Abril 8, 2024, apan mikayo na sab pag-Martes, Abril 9, 2024 ug maayo nalang dali nga napawong ug wa mokatap sa ubang kabalayan. . /
LISUD ANG AGIANAN: Makita nga interior nga bahin sa Barangay Sambag 2 naigo sa sunog, Abril 8, 2024, apan mikayo na sab pag-Martes, Abril 9, 2024 ug maayo nalang dali nga napawong ug wa mokatap sa ubang kabalayan. . / HULAGWAY HINA­TAG NI Joseph Giovani Sentillas Sienes

Sunog miulbo pagbalik sa Sambag 2

Human sa dakong sunog niadtong Lunes, Abril 8 sa Barangay Sambag 2, dakbayan sa Sugbo, nausban na sab pagkasunod adlaw, Martes, Abril 9.

Maayo na lang nga wa makadaku ang kayo nga base sa imbestigasyon sa Cebu City Fire Office nagsugod sa balay ni Roel Derecho, sa Sityo Brupa, Sambag 2, mga ala 1:23 sa hapon.

SALVAGED: Pipila sa mga residente ang mibalik sa ilang nasunog nga balay pamasin nga aduna pay masalbar nga butang. /
SALVAGED: Pipila sa mga residente ang mibalik sa ilang nasunog nga balay pamasin nga aduna pay masalbar nga butang. / AMPER CAMPANA

Dali ra sab nga napawong ang kayo sa kabomberuhan nga nakamugna og kadaut sa balay ni Derecho nga gibana-bana nga mokabat sa P15,500 ang danyos.

Wa pa matino kon unsay hinungdan sa pag-ulbo pag-usab sa sunog.

STATE OF CALAMITY

Gideklarar nga ipaubos sa state of calamity ang Barangay Sambag 2, dakbayan sa Sugbo human naigo sa sunog niadtong Lunes, Abril 8, 2024 nga nakaapekto sa tulo ka mga sityo nga naglangkob sa Kalubihan, Riverside ug Brupa nga naglibot sa Tuberculosis Pavilion.

Ang insedente milamoy sa 104 ka mga balay ug 669 ka mga residente ang nawad-an sa ilang pinuy-anan.

Gibana-bana nga mokabat sa P7,500,000 ang danyos sa sunog. Gikompirmar ni Barangay Kapitan Keith Noel Wenceslao ang maong sitwasyon sa pakighinabi sa SunStar Cebu sa Martes sa buntag, Abril 9.

Ang gidaghanon sa apektadong mga residente milabaw sa inisyal nga bana-bana nga gipagawas sa CCFO human sa insidente.

Matod pa ni Wenceslao nga adunay purohan nga mosaka ang gidaghanon sa mga nabiktima ilabi na nga nagpadayon pa ang ilang gihimong validation sa listahan.

Dugang pa niya nga nagtagbo ang konseho ug nauyonan nga ipaubos sa state of calamity ang barangay aron mapadali ang pag-release sa emergency funds ug resources nga matunol ngadto sa mga apektado.

REBLOCKING

Matod ni Wenceslao nga sa pagkakaron, ang tanang apektadong mga residente anaa sa City Central National High School sa may Osmeña Boulevard sa dakbayan sa Sugbo.

Adunay kinatibuk-an nga 231 ka mga pamilya sa pagkakaron.

Giklaro niya nga dili una niya tugotan nga mobalik ang mga nasunogan nga motukod og balik sa ilang mga panimalay sanglit ipatuman nila ang re-blocking sa lugar.

Si Antonio Isobal, 54, taga Sitio Kalubihan, nangayo og tabang sa Kagamhanan sa Dakbayan aron ilang matukod pag-usab ang ilang balay.

Matod niya nga walo ka tawo ang iyang pamilya, apan pipila lang ka sapot ang iyang natigom alang kanila.

“We hope nga naay monetary assistance nga maabot namo para makasugod mig balik kay lisod gyud among sitwasyon,” matod ni Isobal.

Ang mother-in-law ni Isobal nga si Alicia Jayoma, 64, kinsa na-stroke, nihangyo sab og donasyon nga folding bed, kinsa nagsalig lang sa iyang wheelchair.

ASSISTANCE

Si Portia Basmayor, pangulo sa Department of Social Welfare Services sa dakbayan, niingon nga isip unang lakang, ilang gipaneguro nga mabakwit ang tanang mga biktima ngadto sa tunghaan ug hatagan nila ang mga biktima og pagkaon sa tulo ka kan-anan sud sa unang tulo ka adlaw.

Nag-apod-apod sab sila og disaster kits nga adunay sulod nga banig o habol nga banig nga ginama sa dahon sa pandan, balde, ug hygiene kits. Ang matag apektadong indibidwal makadawat ug lima ka kilong bugas ug de lata.

Dugang pa, ang mga pamilya adunay katungod sa cash assistance ug housing materials sa 10 ka sheets sa galvanized irons ug 10 ka piraso sa plywood gikan sa City Government.

Ang kinatibuk-an ug partially burned nga mga balay makadawat og P20,000; ang mga sharers ug mga nag-abang makadawat og P10,000; makadawat og P5,000 ang mga absentee owners o kadtong mga tag-iya sa balay nga wala nagpuyo.

Base sa inisyal nga datos, adunay 89 ka balay ang totally burned, lima ka partial, 62 ka nag-abang, 37 ka sharer, ug 39 ka lodger.

Sa laing bahin, si Wenceslao niingon nga ilang gi-maximize ang magamit nga electric fan sulod sa mga classroom aron makapabugnaw sa mga nasunogan gikan sa grabeng kainit.

PAG-ULBO

Sa report sa kabumberohan ang sunog niadtong Lunes nagsugod alas 3:57 sa hapon. Unya, giisa kini sa unang alarma sa alas 3:59 sa hapon, gisundan sa ikaduhang alarma sa alas 4:16 sa hapon, ug sa ikatulo nga alarma alas 4:23 sa hapon, niabot sa status nga under control pagka alas 5:01 sa hapon.

Gideklarar sa Cebu City Fire Office nga kontrolado ang sitwasyon alas 8:22 sa gabii, ug hingpit napawong ang kayo pagka alas 10:16 sa gabii.

Adunay tulo ka naangol nga mga indibidwal, lakip ang duha ka babaye nga nag-edad og 22 ug 26 anyos nga naglisod sa pagginhawa, ug usa ka 46-anyos nga lalaki adunay pilas sa wala nga tunga nga tudlo.

Wala pa’y final report ang kabumberohan apan gitan-aw nila nga problema sa kuryente sa aircon nga depektuso maoy hinungdan sa sunog.

Dugang pa niini, ang kahagip-ot sa mga karsada sulod sa maong dapit hinungdan nga milanat og pito ka oras ang ilang pagpawong sa kayo. / DVG / KJF

Related Stories

No stories found.
SunStar Publishing Inc.
www.sunstar.com.ph