Suns gitipi ni Curry

Tres ni Curry sa 0.7 segundos mipadaug sa Warriors
DAOG NGA ITSA: Si Stephen Curry sa Golden State Warriors miitsa sa game-winning nga tres atubangan kang Devin Booker sa Phoenix Suns sa National Basketball Association regular season game.
DAOG NGA ITSA: Si Stephen Curry sa Golden State Warriors miitsa sa game-winning nga tres atubangan kang Devin Booker sa Phoenix Suns sa National Basketball Association regular season game. AP

Gipakita ni Stephen Curry kon nganong siya ang pinaka-clutch player karon nga season pinaagi sa game-winning nga tres sa nahabiling 0.7 segundos sa duwa nga maoy mituboy sa 113-112 nga kadaugan sa Golden State Warriors batok sa Phoenix Suns sa National Basketball Association (NBA) regular season game sa Dominggo, Pebrero 11 (PH time) sa San Francisco, California.

Naglabaw ang Suns, 112-110, sa nahabiling 3.3 segun­dos, sa wa pa ang clutch three-pointer ni Curry.

Nadawat ni Curry ang bola gikan sa inbound pass ni Brandin Podziemski ug gitira ang 33-footer nga tres atubangan sa depensa sa Suns nga mao iyang ika siyam nga 3-pointer sa duwa.

Gitapos ni Curry ang duwa nga adunay 30 puntos.

Ang 35-anyos nga beterano mao ang leader sa total clutch points sa 2023-2024 season basi sa NBA clutch statistics.

Matod sa NBA.com, makuha ang clutch stats kon ang duwa galigas lamang og five points sa last 5 minutes sa fourth quarter o overtime. Ang puntos sa player anang tungora ihapon isip clutch points.

Human sa tres ni Curry, naa pa untay tsansa ang Suns nga mabali ang resulta, apan pakyas kini sa duha ka higayon.

Una, si Booker nakadawat sa bola sa ilawom apan na foul kini ug wala pa sa penalty ang Warriors. Sa sunod nga play, napasahan si Kevin Durant pero wa kini makaitsa tungod sa hugot nga depensa ni Draymond Green.

Nitabang kang Curry sa pamuntos si Jonathan Kuminga nga miamot og 21, samtang si Green mitali og all-around game nga 15 puntos, siyam ka assists ug pito ka rebounds.

Nabalik pud sa Warriors si Gary Payton human nipahuway og 16 ka duwa tungod sa left hamstring strain. Miamot kini og 11 puntos. Si Booker nitali og 32 puntos samtang si Durant nimugna og 24 puntos alang sa Suns. / RSC

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph