Padayon sa pagsidlak ang hosts Phoenix Suns bisan wala ang usa sa ilang mga lider nga si Kevin Durant ug ilang gipangpaig ang Portland Trailblazers, 109-88, ning Martes, Enero 2, 2024 (PH time) sa National Basketball Association (NBA).
Wala nakaduwa si Durant tungod kay aduna kini angol (right hamstring tightness) apan taliwala niini, nakontrolar gihapon nila ang engkuwentro aron iposte ang ikaupat nilang sunodsunod nga kadaugan.
Pito ka mga magduduwa sa Suns ang ningmugna og doble’ng numero nga mga puntos pinangulohan ni Bradley Beal, kinsa nirehistro og 21 puntos.
Si Jusuf Nurkic niamot og 18 puntos alang sa Suns, nihatag og 14 puntos ang nipuli sa puwesto ni Durant nga si Chimezie Metu samtang ninghatag og 12 puntos matag usa sila si Grayson Allen ug Eric Gordon.
Ang laing pambato sa Suns nga si Devin Booker igo lang nakamugna og 10 puntos, tataw nga nabahin og insakto ang ilang opensa.
Nagkanayon si Suns coach Frank Vogel nga dili pa sila makaseguro kon kanus-a makabalik pagduwa si Durant.
“He’s day to day,” pasabot ni Suns coach Frank Vogel.
Ang Trailblazers gipangulohan ni Scoot Henderson pinaagi sa iyang 17 puntos, nitunol og 15 puntos si Jerami Grant samtang ningtampo og 10 puntos matag usa sila si Malcolm Brogdon ug Jabari Walker.
Ang kanhi pambato’ng sentro sa Suns nga si DeAndre Ayton wala nakaduwa sa Trailblazers tungod kay aduna kini angol (right knee tendinitis).
Naglabaw og siyam ka mga puntos ang Trailblazers human sa 1st quarter, 29-20.
Apan human niini, nausab na ang dagan sa estorya ug nakontrolar sa Suns ang kombati hangtod na sa katapusang gutlo.