Nakatali ang SunStar Cebu basketball team og usa ka daog ug usa ka pilde sa unang duha ka duwa sa 2025 Press Freedom Cebu Media basketball tournament nga gipahigayon sa Cebu Eastern College (CEC).
Gipilde sa Distruptors ang Brigada FM, 60-28, sa pagbukas sa torneo niadtong Biyernes, Agusto 15, diin ang bigman nga si Rodilo Lim mipakatap og 15 puntos.
Apan, nakatilaw og unang pilde ang SunStar batok sa MyTV Cebu ug People’s Television Network (PTV), 46-51, niadtong Dominggo, Agusto 17, human mibuto si Karl Adriane Donal og 28 puntos alang sa MyTV/PTV.
Nibuhat si Robert Aniñon og 11 puntos samtang sila si Richiel Chavez ug John Osmil nakadugang ug 10 puntos matag-usa para sa SunStar.
Sa laing duwa sa Domingo, gipilde ang Tri-Media selection ang Brigada, 43-33; gilubong sa XFM ang CCTN, 71-49; ug gipatapsingan sa DYHP ang Bombo Radyo, 49-44.
Gawas sa basketball, aduna usab volleyball competition ang maong kalihukan nga gisuportahan sa Aboitiz ug sa CEC management isip host venue.
Sa volleyball, gilupig sa SunStar ang Brigada FM pinaagi sa straight sets, 25-20, 25-18, niadtong Sabado.
Lakip sa winning squad sila Kenneth Torres, Jean Mondoñedo, Robert Aniñon, Jade Laranjo, Pauline Gillera, Hannah Ballestin, Gerramae Villarin, Kerstel Medalle, Denise Codis, Tony Onrejas, ug Joshua Solano. / RSC