MASIPANG buto ang ningsugat sa kampanya sa volleyball back-to-back champions SunStar Disruptors human niini gipangbuntog ang usa sa mga inilog nga mao ang dyHP Radio Mindanao Network (RMN) sulod sa tulo ka sets sa pagsugod sa 2024 Cebu Press Freedom Week sports competitions niadtong Dominggo, Agusto 18, 2024, sa Cebu Eastern College (CEC) gym.
Sa pagpangulo nila ni team captain Kenneth Torres ug June Ygot, ang Sun.Star nagkontrolar sa 1st set ug gipanghampak ang DyHP RMN, 25-20.
Apan sa 2nd set, nakamugna og daghang turnovers ang Sun.Star nga gipahimuslan sa dyHP RMN aron angkunon ang kadaugan, 25-23.
Sa deciding set, nagkumboya ang tanang mga sakop sa Sun.Star aron iselyo ang kadaugan, 15-12.
“Lipay kaayo mi kay nidaog mi batok sa lig-on nga kontra. Naningkamot mi’ng tanan. Resulta kini sa team effort,” matod ni Torres.
Sa basketball event, lahi ang nasinati sa Sun.Star gumikan kay nasugamak kini sa overtime nga kapildihan batok sa GMA 7, 67-63.
Nagsuporta sa volleyball event mao ang Visayan Electric samtang ang nag-abag sa basketball event mao ang Aboitiz Power. (ESL)