Misutoy ngadto sa dominanteng kadaogan ang SunStar Cebu batok MyTV Cebu, 83-49, sa 2024 Cebu Press Freedom Week (CPFW) basketball tournament Biyernes sa gabii, Agusto 23, sa Cebu Eastern College Gym dakbayan sa Sugbo.
Ang guard nga si Robert Aniñon mipupo og 18 puntos nga kasagaran gikan sa nindot nga lusot ngadto sa basket.
Midugang og 16 puntos si Hexter Zerda alang sa SunStar, nga nakabalos human mapilde sa overtime kontra GMA/dySS Kapuso, 63-67, sa ilang unang duwa.
Sa laing mga duwa, ang defending champion XFM 88.3 Ka Tropa ug Kapuso pulos malampuson sa ilang managlahi nga duwa.
Ang Ka Tropa milubong sa Brigada, 87-47, samtang ang Kapuso mikulata sa Cebu Catholic Television Network (CCTN), 68-48.
Si Johnley Bayking mitira og 24 puntos, si Morris Mankikis miamot og 18 ug si Jhayrow Bayking midugang og 14 alang sa XFM, kinsa mipasolido sa ilang gunit sa No. 1 spot sa Bracket A bitbit ang 2-0 (win-loss) rekord sa torneyo nga giisponsoran sa Aboitiz Power.
Ang Brigada nakakuha og 17 puntos kang Marvin Hermoso ug walo ka puntos kang Atty. Juril Patiño.
Samtang ang GMA mipasolido pud sa ilang gunit sa top spot sa Bracket B dala ang 2-0 nga baraha.
Si Janry Bohol mipuntos og 17 ug si Julius Vidal mitira og 12 sa GMA.
Samtang daog ang DyHP/ Radio Mindanao Network Kasama kontra Bombo Radyo/dyKC/dyLA, 72-55. /
Ang torneyo lakip sa mga aktibidadis sa selebrasyon sa Cebu Press Freedom Week karong Septiyembre. / RSC