Super B alang sa usa ka stamp maker

KADA ADLAW: Nahimo nang tipik sa adlaw ni Adel Capacio, 53, stamp maker sa Dalan Colon, dakbayan sa Sugbo ang pagbasa og Superbalita Cebu sulod na sa katuigan. / CLAUDINE D. FLORES
KADA ADLAW: Nahimo nang tipik sa adlaw ni Adel Capacio, 53, stamp maker sa Dalan Colon, dakbayan sa Sugbo ang pagbasa og Superbalita Cebu sulod na sa katuigan. / CLAUDINE D. FLORES

Kalangas sa wangwang sa tibuok adlaw ang iyang madunggan sa dalan Colon, dakbayan sa Sugbo.

Apan alang kang Adel Capacio, 53, dili kini babag nga dili siya makabasa og mantalaang Superbalita Cebu nga iyang pangitaon kon di siya mahatdan sa iyang suki nga news boy, kinsang tingog malubong sa kagahob ug ka saba sa downtown sa dakbayan.

“Usa ka adlaw nga dili ko kabasa, mangita ko og way nga makakita ko og asa ang namaligya,” matod ni Capacio nga nagpuyo karon sa Brgy. Duljo-Fatima, dakbayan sa Sugbo.

Lumad nga taga Palo, Leyte si Capacio, siya niabot sa Sugbo dihang nikuyog siya sa iyang uyoan niadtong 1986 ug nagsugod na ang iyang pwesto sa rubber stamp ug pagbasa sa Super B sa aseras sa dalan Colon.

“Naa koy Superbalita kada-adlaw kay naa koy suki, dugay-dugay nako nga sige og basa ani,” sumala ni Capacio nga nangapo og siyam kabuok ug namat-an nalang sa mga bata ang pagbasa og Super B.

Gipamatud-an usab ni Capacio nga mismo ang iyang Super B hulaman sa iyang mga kauban.

“Ipasa-pasa gud ni namo ang newspaper kay mao ray basahon,” gisaysay ni Capacio.

Mobasa usab og Super B ang iyang 74-anyos nga ugangan ug kini lamang ang ilang gisunod nga tinubdan sa balita.

“Mismo akong ugangan mao say ilang basahon ug mao na nga igka human nako dire og basa, akong dal-on ni sa balay kay mobasa man sab sila,” batbat ni Capacio.

Nasayod siya nga naay kalahian sa laing mantalaan apan sa Super B siya nakauyon pag-ayo.

“Ganahan man ko ani [Super Ba­lita] kay daghan kaayong mga news ug daghan usab kaayo og mabasa.”

Nisubay usab si Capacio sa iyang nasinati nga sitwasyon diin naay duha ka semana nga wala siya mahatdi.

“Dili ko makasubay sa panghitabo ug dili ko maka-update.”

Apan maayo na lang kay naa siyay nakit-an nga nagsuroy-suroy nga newsboy ug nagpahatud nalang siya samtang wala iyang suki.

“Lahi man sa online, mas maayo sa newspaper kay naa na tanan ug han-nay nah.”

Wala gihapon mamatay ang industriya sa newspaper kay sama sa usa ka sitwasyon diin naa niduol ang usa ka parokyano ug nihangyo nga paliton ang iyang newspaper apan dal-on man kini ni Capacio alang sa iyang ugangan.

“Atong panahona wala nako gipaulian niya,” ug didto nasinati ni Capacio nga naa pa gyud diay mobasa og mantalaan.

Malingaw usab siya sa mga seksyon sa Super B, labi na ang sulat ni Noy Kulas.

“Ganahan ko sa seksyon ni Noy Kulas kay naa man guy part sa pamilya ug mga bisag-unsang problema ug maghulat gyud ko sa mga isyo ana kay mura ba og mag ‘marites’ ba.”

Apan labaw sa tanan alang kang Capacio, naay additional knowledge ang mobasa og balita. “Dire gyud sa Superbalita naa gyud koy nakat-unan ani nga mga pagtulon-an kay makadasig siya sa akong kaugalingon.”

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph