Makapanlimbawot ang mga trahedya karon sa eroplano. Mao nay giingon nga dili gyud ma-tag-an ang kinabuhi. Apan nasayod ka ba nga namatay sab ni sila sa disgrasya sa eroplano? Sikat kaayo ni ilang mga kanta. Pamilyar ka?
JOHN DENVER
Siya ang usa sa mga best-selling artists niadtong `70s ug `80s diin lakip sa iyang iconic songs ang “Take Me Home, Country Roads” ug “Annie’s Song.” Usa sab siya ka piloto. Apan na-crashed ang iyang eroplano nga maoy nakaingon sa iyang hinanaling kamatayon sa edad nga 53 niadtong 1997.
JIM CROCE
Ang American folk singer-songwriter 30 anyos lang dihang namatay ni sa plane crash niadtong 1973. Ang iyang eroplano nahagsa usa ka oras human sa iyang show sa Louisiana. Pipila sa iyang biggest hits ang “Time In A Bottle,” “Photographs and Memories” ug “Ill Have To Say I Love You In A Song.”
RITCHIE VALENS
Ang American guitarist, singer ug songwriter ang nagpasikat sa kantang “La Bamba.” Apan walo kabuwan human sa iyang breakthrough song nadisgrasya ang gisakyan nilang eroplano. Ang iyang mabulukong career sa edad nga 17 wa damhang natapos lang dayon niadtong 1959. Lakip sa naka-las ang sikat nga singer nga si Buddy Holly, 22.
BUDDY HOLLY
Silang kaubana ni Ritchie Valens ug ubang artists nga gikan sa concert dihang nahagsa ang ilang abyon. Ang maong hitabo ang nailang “The day the music died” nga maoy gipasabot sa 1971 song ni Don McClean nga “American Pie.” Si Buddy Holly ang singer-songwriter sa classic pop nga “True Love Ways” ug “Everyday.”
PATSY CLINE
Walay commercial plane tungod kay naglain ang panahon, si Patsy Cline didto nisakay sa iyang manager nga usa ka piloto. Apan mao na diay to ang ilang katapusan. Ang ilang eroplano nabangga sa kalasangan ug walay naka-survive. Ang iconic singer sa classic hit nga “Crazy” nipanaw sa edad nga 30 niadtong 1963.
MELANIE THORNTON
Ang American pop singer unang naila isip lead vocalist sa Eurodance group nga “La Bouche” nga nagpasikat sa kantang “Be My Lover” ug “Sweet Dreams.” Nagmalampuson sab ni isip solo artist. Apan niadtong 2001, ang 34-anyos ang usa sa mga 24 nga namatay sa na-crash nga Crossair Flight sa Switzerland.