Super Suroy: 'A must-visit' nga mga simbahan sa Bohol (Part 1)

Dimlao
Dimlao

Naila ang Probinsiya sa Bohol dili lamang sa iyang mga toursist spot kon dili usab ang mga karaan ug makasaysayanong mga simbahan nga naglibot sa tibuok lalawigan. Gani, naila usab ang maong probinsiya nga hugopan sa mga Bol-anon nga atua na nanimuyo sa ubang mga lugar aron mamiyesta.

Matag adlaw sa bulan sa Mayo adunay kapilya o ba kaha simbahan nga magsaulog sa kapiyestahan sa ilang patron. Atong libuton ang mga makasaysayanong simbahan sa Bohol.

Dauis Church
Dauis Church

1. Dauis Church - Ginganlan og Our Lady of Assumption Church, gitukod niadtong 1697, usa kini sa labing gibisita nga mga lugar sa lungsod sa Dauis, ug alang nako usa sa mga maanindot nga simbahan. Ang estilo sa istruktura nagsagol nga gibase sa Byzantine ug Romanesque nga arkitektura. Ang interior nga bahin ilabi na ang kisame, gipintalan ni Ray Francia kaniadtong 1916. Usa sa mga talagsaon nga anaa sa maong simbahan mao ang atabay sa may altar nga mahimo’ng makuhaan og tubig mainom.

Tagbilaran
Tagbilaran

2. Tagbilaran Church - Opisyal nga naila nga The Cathedral of St. Joseph the Worker ug bag-o lang mipahigayon sa ilang tinuig nga pangilin niadtong Mayo 1. Ang Jesuit nga simbahan maoy usa sa labing karaan sa siyudad, ug bisan sa tibuok probinsya. Natukod kini human ang mga misyonaryo nidagsa sa Bohol niadtong tuig 1595. Ang maong simbahan makadaghan na gipaubos sa renovation gikan sa tuig 1893 ngadto na sa 1970.

Baclayon Church
Baclayon Church

3. Baclayon Church – Ang Our Lady of the Immaculate Conception nga nailhan isip ikaduhang labing karaan nga simbahang bato sa Pilipinas. Gihimo kini gikan sa mga coral stone ug gisemento gamit ang puti sa kapin sa milyon-milyong itlog. Ang simbahan gilibutan sa mga bato nga edipisyo nga gidugang balik sa ika-19 nga siglo sa Augustinian Recollects. Gideklarar sab kini nga National Cultural Treasure sa National Museum of the Philippines niadtong 2010. Usa kini sa mga tourist destination ug atraksyon sa Bohol ilabi na niadtong mga Katoliko ug mahiligon sa makasaysayanong mga lugar.

Panglao Church
Panglao Church

4. Panglao Church - Nahimutang sa habagatan-kasadpang bahin sa Panglao, Bohol, 18 kilometros ang gilay-on gikan sa Tagbilaran City, makita ang kanindot sa simbahan ni St. Augustine, ang simbahan sa Panglao. Niadtong 1803, gidumala sa Recollects ang lungsod sa Panglao. Ang simbahan ni St. Augustine nailhan tungod sa iyang mga mural sa kisame nga mahimo’ng mga sakramento. Ang kisame niini napuno sa mural sa Holy Trinity nga gilibutan sa walo ka mga dibisyon sa mga anghel. Adunay tulo ka kinulit nga mga retables sa altar, duha sa bukton sa transept, ug ang lain naa sa sentro nga nave.

Alburquerque Church
Alburquerque Church

5. Alburquerque Church – Nahimutang sa lungsod sa Alburquerque ang maong parokya ubos sa hurisdiksyon sa Diocese of Tagbilaran ug gideklarar sa National Museum of the Philippines isip Important Cultural Property niadtong 2013. Gitawag sa mga Boholano ang lungsod nga ‘Albur,’ nahimutang sa daplin sa highway mao ang complex sa simbahan nga gitukod sa gamay nga bungtod. Ang parokya sa Albur natukod niadtong 1869 human nahibulag sa Baclayon, Bohol.

Dimiao Church
Dimiao Church

6. Dimiao Church – ang San Nicolas de Tolentino Church, usa ka karaan nga simbahang Romano Katoliko ug National Cultural Treasure nga nahimutang sa Dimiao, usa ka lungsod nga naa sa habagatang bahin sa Bohol. Mao kini ang ikaunom nga parokya nga gitukod sa Jesuits sa Bohol sa panahon sa mga Espanyol. Wa matino ang tukmang petsa kanus-a kini natukod apan base sa kasaysayan, nahisgutan ang maong simbahan niadto pang 1750. Adunay mga restoration nga gihimo human naguba niadtong 7.2-magnitude nga linog niadtong Oktubre 15, 2013 samtang ang atop niini naguba sa super typhoon Odette niadtong Disyembre 17, 2021. /

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph