Jerson Ceniza / Nagsuwat
Jerson Ceniza, FB Pinsoy Campsite FB page / Mga hulagway
Sayong bahin ning buwana, Hunyo 14, 2025, sa eksakto, ang anak sa akong higala niapil sa swimming competition isip kabahin sa Piña Festival nga gihimo sa Dakbayan sa Ormoc. Tungod niini, among giuyonan sa akong mga barkada nga mosabay sa maong okasyon ug among gisumpayan kini og gamay nga adventure ngadto sa usa sa among dugay nang damgong bisitahan—ang Lake Danao.
Lahi kini nga panaw kumpara sa among kasagarang mga suroy-suroy. Wala mi nagdala og motorsiklo karon kay duna may mga bata nga among kuyog. Hinuon, among gigamit ang sakyanang four-wheeled aron mas kombinyente ug luwas para sa tanan. Nilarga mi Biyernes sa gabii, Hunyo 13, gikan sa Dakbayan sa Sugbo ug nisakay og barko padulong sa Ormoc.
Sa Sabado, adlaw sa swimming competition, didto ra mi kutob sa venue. Pagkahuman sa kalihukan, hapon na mi nidiretso sa Lake Danao nga mga 17 kilometro ang gilay-on gikan sa sentro sa siyudad. Tuyo unta namo nga magpabilin didto og usa ka gabii aron mas masinati gyud namo ang katahom sa lugar nga dugay na namo gihandom nga bisitahon.
Apan sayop diay ang among pagtuo, dili diay pwedi mag-overnight sa Lake Danao. Didto, nidangat ang among kabalaka tungod kay wala pa mi kasiguro og kapuy-an.
Bisan pa man, suwerte gihapon mi. Pinaagi sa Google Maps, among nadiskubrihan ang usa ka dapit nga gitawag og Pinsoy’s Campsite Integrated Farm nga nahimutang sa Purok 5, Barangay Milagro, Ormoc. Kon gikan ka sa city center paingon sa Lake Danao, imong maagian kini nga lugar.
Pag-abot namo didto, napapas ang among kabalaka. Nindot ug malinawon ang palibot, ug bugnaw ang klima tungod kay elevated ang lugar. Sa pipila ka mga oras, magpakita ang fog, usa ka kahinam nga kasinatian. Luwas sab ang lugar kay kini kinoral og maayo.
Nagdala mi og tent, ug tag P100 ang bayad sa matag usa niini, gawas pa sa bayad sa matag tawo nga P100 sab. Naa sab silay mga tent nga paabangan sa tag P350, ug aduna sab silay mga kwarto nga pwedi kapuy-an, apan wala na mi nangutana sa rates niini kay camping gyud ang among tuyo.
Sulit kaayo ang among kasinatian. Sa buntag, sa dihang nangmata mi, among nakita ang talagsaong talan-awon sa Camotes Sea. Limpyo ang palibot, bugnaw ang hangin, ug berde ang malantaw sa tanang direksyon.
Pagkahuman namo og pamahaw, nibalik kami sa Lake Danao nga duol ra sa campsite. Didto, among nakita ang ilang floating cottage nga tag P400 ang abang matag oras, apan wala na mi nanakay. Kon molapas sa usa ka oras, P200 kada dugang nga oras. Aduna sab silay kayak nga pwedi sabakan sa tag P200 matag oras.
Sa tibuok kasinatian, mapasalamaton kami sa kahigayunan, usa ka pinalahi nga panaw nga puno og katahom, kalipay, ug kasinatian nga dili malimtan. Among nasud-ong ang Lake Danao ug aksidenteng nakaplagan ang matahom kaayo nga campsite. /