Sa kinapusuran nga bahin sa Iligan City, Lanao del Norte nahimutang ang panimalay nga nakatampo sa kasaysayan sa nasod.
Ang maong balay maoy gidak-an sa ika-14 nga presidente sa Pilipinas, Gloria Macapagal-Arroyo, nga ang iyang mga tunob sa bata pa nagpabilin ug nidunggan sa hawanan ngadto nga siya nahimo’ng hamtong.
Sa akong pagsuroysuroy sa maong dapit, sa pagtungtong sa tanaman, mabusog ang imong mga mata sa kaanyag sa hawanan o palibot.
Ang maong pinuy-anan nahimo’ng instrumento sa pagpalad sa kahibawo, imahinasyon ug pagmatuto ni former President Gloria.
HERITAGE SITE
Ang maong balay karon usa ka heritage site ug importanteng kabilin tungod sa makasaysayanong koneksyon niini sa kasaysayan ug gihimo ka kini’ng usa ka museyo.
Ang amahan ni Gloria nga si kanhi Presidente Diosdado Macapagal, giingon nga mag opisina usab dinhi kay aduna pay kabilin nga office table ug anaa pa ang kinulit sa kahoy nga desk name plate.
Ang maong panimalay dili maluho nga mansyon. Samtang klaro nga usa ka komportable nga balay, nga halayo sa kasaba sa dakbayan.
Sa sulod nga bahin, makita ang litrato, eskultura, ug personal nga mga handumanan nga naghanduraw sa mga tipik sa ilang kinabuhi.
Nindot usab ang sala ug ang disenyo. Taliwala sa gihimo’ng restoration nagpabilin gihapon ang orihinal nga structure niini.
Ang mga chandelier, galamiton, suga sa kilid, picture frames maampingong gipahiluna nga dayag nga makita niadtong buot moduaw o mosuroy sa maong balay.
Makita dinhi ang lainlaing mga hulagway sa pamilyang Macapagal-Arroyo. Talagsaong mga hulagway mao si Gloria uban ni Bill Clinton; ang bata nga si Gloria kauban ang iyang amahan ug ang kasal ni Gloria ug Mike Arroyo.
Ang mga lawak ni Diosdado ug sa iyang asawa, si Gloria, ug sa lola ni Gloria nindot gihapon tan-awon ug maayo ang pagmentinar.
ASA DAPITA?
Ang Macapagal-Macaraeg Ancestral House nahimutang 20-30 minutos gikan sa sentro sa siyudad sa Iligan. Walay singko minutos ang gilay-on naa ang inila nga Maria Cristina Falls ug naa ra sab sa duol ang mga swimming pool sama sa El Lauriento, Dela Mar ug Timoga Spring Pool.
SKEDYUL
Ang mga oras sa pagbisita sa Macapagal-Macaraeg Ancestral House bukas sa Lunes ngadto na sa Biyernes gikan sa alas 8 sa buntag -alas 5 sa hapon.
Samtang sa Sabado-Dominggo buksan sa alas 9:00 sa buntag - 4:00 sa hapon.
Libre ra ang gusto mosulod ug mamahimo’ng mohatag bisan pila nga kantidad isip donasyon. /