Super Suroy: Ang 'Picture Perfect' nga The Alicia Panoramic Park

BREATHTAKING VIEWS: Ang makatalinghog nga talan-awon sa Binabaje Hills sa lungsod sa Alicia, Bohol makahupay sa kakapoy sa matag indibidwal nga mosaka dinhi. / Hulagway kuha ni Charry Coronel
BREATHTAKING VIEWS: Ang makatalinghog nga talan-awon sa Binabaje Hills sa lungsod sa Alicia, Bohol makahupay sa kakapoy sa matag indibidwal nga mosaka dinhi. / Hulagway kuha ni Charry Coronel

Ang Bohol maoy usa sa labing gidayo nga probinsiya sa Central Visayas. Base sa datos sa tourist arrival sa Department of Tourism (DOT-7) niadtong 2022, kapin sa 500,000 domestic tourists samtang kapin 30,000 ka mga langyaw nga turista ang ningbisita sa maong probinsiya.

Dili ikalimod ang pagsaka sa gidaghanon sa mga turista nga mobisita sa Bohol kay ang maong lugar gipakasama sa usa ka paraiso.

Kon basehan ang datos sa DOT 7 niadtong 2022, ang Panglao ang labing gidayo nga lungsod sa mga lokal ingon man langyaw gumikan sa mga beach resort ug ubang mga activities nga ilang gitanyag.

Kon ikaw mahiligon mokatkat sa bukid, ang Bohol wala usab magpauwahi.

Usa ang The Alicia Panoramic Park (TAPP) sa Barangay Cambaol, Lungsod sa Alicia ang nikulit na og ngalan sa mga hiker ug adventure-seeker.

Ang picture-perfect ridge trails ug landscape sa Bina­baje Hills maoy nakaingon nganong garbo kini sa mga Bol-anon. Ang bukid nga adunay gitas-on nga 400 meters above sea level nga gihabulan sa mga sagbot nga cogon.

ENTRANCE, GUIDE FEE

Sa dili pa makasaka sa TAPP, ang local government sa Alicia nag-require sa mga hiker nga mokuha og guide.

P300 ang bayad sa guide kon day hike samtang P500 kon mag overnight.

Adunay P30 nga entrance fee ug mamahimong makaabang og tent ug trekking pole.

Depende sa pacing, ang ki­natibuk-ang hike moabot og 2 ngadto sa 4 ka oras.

Kon mag day hike, advisable nga magsugod og hike alas 4 a.m. samtang alas 4 p.m. kon mag overnight camping aron kalikayan ang tumang kainit sa adlaw.

PREPARATION

“Crazy and steep.” Gihulagway sa mga guide nga dili lisud apan dili pod sayon ang trail sa Binabaje Hills maong mas maayo nga mangandam sa dili pa mosaka.

Magsuot og light long sleeves ug long pants panagang sa init tungod kay open area ug natabunan sa cogon ang trail.

Bintaha nga magdala og tubig ug light snacks. Angayan sab nga mag-exercise sa dili pa mosaka aron molahutay sa binaktasay.

UNSAON PAG-ADTO?

Adunay daghang biyahe kon maggikan sa Cebu paingon sa Bohol apan mas duol ang Ubay padulong sa Alicia. Moabot og 4 ka oras ang biyahe via Cokaliong Shipping.

Gikan sa pantalan sa Ubay, mosakay og tricycle padulong sa bus terminal. Mosakay og bus via Tagbilaran padulong sa Alicia Municipal Hall o jump off point sa TAPP.

Kon inyong masuroyan ang TAPP, siguradong worth it ang experience.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph