Sikat kaayo karon nga destinasyon sa Mindanao ang Lalawigan sa Bukidnon. Gawas nga mas sayon ning adtuon kon taga Cebu ka, mas ma-feel nimo ang nature.
Gani, ang Bukidnon gitawag man og summer capital sa Mindanao. Dili ikalimod kay tinuod nga ang Bukidnon maanindot nga alternatibo sa summer capital of the Philippines.
Of course, among giadto ang sikat kaayo nga Dahilayan Forest Park sa Mt. Kitanglad, maisip nga sama og Baguio City tungod sa iyang palibot ug kabugnaw, minos sa traffic.
Aron among masinati ang kaanindot sa dapit, ning-abang mi sa akong mga kauban og buggy nga among gisakyan sa pagsubay sa 3.2 kilometro nga trail. Dili lang kay kini ra, nanakay sab mi og go-kart nga gipalibot nako og duha ka rounds.
Lain namong gisakyan ang ilang extreme razorback nga nagtadlas sa kalasangan ug mopapaspas sa imong adrenaline. Wala mi namiya kon wala mi nakakaon sa ilang lamian nga adobong manok ug pochero. Busog much kay lami gyud kaayo.
Amo usab nga gitungas ang Kiamo Ridge Café sa Mt. Kiamo. Lisod ang pag-adto tungod sa hagip-ot kaayo nga kalsada, apan kay maayo man ang ilang food review, amo gyud ning giadto aron maka-sample mi. Lamian ang ilang mga pagkaon, labina ang ilang frappes ug espresso.
Kinsa bay magtuo nga makatilaw ka lang og ingon niani sa mga siyudad lang, wala sa kabukiran.
Kon moadto ka og Bukidnon, ayaw usab sipyata ang paglantaw sa maanindot nga view sa Lake Apo. Ang ilang floating cottage magtanyag og maanindot kaayo nga talan-awon.
Aron makasuway mi og horseback riding, nangadto sab mi sa communal ranch. Sa amoa sa Talamban naay mga kabayo nga ako rang pagalantawaon. Kon wala ko makaadto og Bukidnon, wala ko nakasuway sa pagsakay og kabayo.
Tulo ka adlaw ming nagpuyo sa Bukidnon. Ang bakasyon maanindot ug nagpabaskog og balik namong 12 ka managkauban ug managhigala, di lang sa emosyunal, kon di, apil na usab ang mental, ug duna say spiritual. /