Ang Bohol usa sa mga gidayeg nga lalawigan o probinsiya sa Pilipinas nga naila tungod sa natural landmark nga Chocolate Hills, lakip na ang mga makadani nga beaches sa Panglao ug Anda.
Silingan ra kini sa Cebu, ug accessible nga kasuyoran alang sa mga moduaw sa maong probinsiya.
Ang siyudad sa Tagbilaran mao ang sentro sa Bohol nga gihinganlan og “City of Peace and Friendship”, nga nagtanyag og usa ka kombinasyon sa moderno nga siyudad ug natural nga kanindot sa lugar.
Ang mga dumoduong mamahimong makasuroy sa makasaysayanong mga dapit sama sa karaang tugpahanan ug mga karaang simbahan sa panahon sa Espanyol.
ANDA BEACH
Gipasigarbo sa Anda Beach ang ilang lapad ug puti nga balas ug tin-aw nga tubig. Sikat ang maong beach, nindot suroyan gawas sa pagpangaligo ingon man ang pag-sunbathing, ug mga beach activity diha sa baybayon.
Ang mga bisita makapangita og landong ilawom sa mga palm tree o mag-abang og gagmay nga mga cottage alang sa mga piknik ug pagpahayahay. Bisan tuod dili kini sama ka lambo sa ubang mga baybayon sa Bohol, ang Anda Public Beach perfect alang sa bonding sa pamilya ug mga higala.
CADAPDAPAN RICE TERRACES
Makita sa Munisipalidad sa Candijay, ang Cadapdapan Rice Terraces usa ka obra sa mga mag-uuma sa Bohol. Nagtanom silag humay sa mga bakilid pinaagi sa paghimo'g mga terraces, nga morag ang-ang sa higante nga hagdanan. Kini usa ka matahum nga talan-awon ug usa ka maayong paagi aron makita kon unsa kakugihan sa mga mag-uuma nga gipangitaan og paagi ang ilang pagpananom.
ALICIA PANORAMIC TRAILS
Ang Alicia Panoramic Trails, nga nahimutang sa Alicia Bohol, nagtanyag og talagsaong lapad nga talan-awon nga mga bungtod nga daw gihabulan og berde nga sagbot.
Ang mga agianan naghatag og usa ka kasarangan nga hagit sa pagbaktas ug pagsaka paingon sa kinatumyan sa bukid. Ang mga bisita makatagamtam sa malinawon nga talan-awon ug makakita sa lagyong mga isla ug sa talagsaon nga geological formation sa Bohol. Kini usa ka perpekto nga lugar alang sa mga mahigugmaon sa kinaiyahan ug kadtong nalingaw sa usa ka matahum nga adventure.
BILAR MAN-MADE FOREST
Kining talagsaon nga lasang gitanom sa mga tawo sa nangaging katuigan. Karon kini usa ka taas, bugnaw nga lugar nga mamahimong magbaktas o biseklita.
Ang tag-as nga mga kahoy nagpabati niini nga hilom ug malinawon, ug tingali makakita ka pa gani og pipila ka makaiikag nga mga langgam o mga mananap. /