Sa mga nakasuroy na sa isla sa Camotes, sakop sa Lalawigan sa Sugbo, di gyud mapul-an bisan magbalikbalik sa maong isla nga sikat sa ilang white sand beaches ug mga langob.
Inanay nang nailhan ang isla, dili lang sa lokal nga mga turista, lakip na sa mga langyaw ilabi na niadtong mga adventure seeker.
Sa makadaghang mga higayon na ko misuroy sa maong dapit, usa sa akong ikapanghambog nga nasuroyan mao ang Bukilat Cave.
Nahimutang sa Tudela, isla sa Camotes nga usa sa walo ka mga langob nga nahimutang sa maong isla.
Sigun pa sa katiguwangan nga diha sa maong langob gihipos ang karaang bahandi nga giingong kabahin sa Yamashita treasure.
Kon basehan ang kasaysayan panahon sa gubat tali sa mga Hapon, ang Bukilat Cave nagsilbing tagoanan sa mga lokal aron pagtago gikan sa gihulagway nga mabangis nga mga sundawo’ng Hapon.
FEATURES
Apan taliwala niini,nahimong garbo sa isla ang maong langob nga daw gi-adurnohan sa stalactites ug stalagmites formation sud sa langob nga nagsilbing chandelier niini.
Samtang ang kahayag gikan sa ibabaw naghatag og dan-ag sa langob nga miiwag sa katin-aw sa tubig.
Ang gilawmon sa tubig mag-agad kon taob o hunas ang dagat.
Dili makompleto ang imong adventure kon igo lang kini nimong sud-ongan, ilabi na nga gumikan sa iyang kalimpyo ug katin-aw, sigurado kang madani sa pagsawom sa bugnaw nga tubig.
Minimal lang ang entrance fee nga bukas gikan sa alas 8:00 sa buntag ngadto na sa alas 5:00 sa hapon.
Ang local nga kagamhanan sa Camotes mipahinumdom sa mga bisita nga gidili ang pagkaon, pag inom-inom ug pagpanigarilyo sulod sa langob.
Kini tungod sa tinguha nga pabilin nga limpyo ug kapanalipdan ang maong bahandi aron nga mapahimuslan sa sunod pa nga henerasyon.
TOUR PACKAGES
Sa mga wa masuheto sa lugar, adunay nay gitanyag ang mga travel and tour agency ug siguradong nalakip ang Bukilat Cave, Camotes nga anaa sa Top 10 most visited.
Sa gusto’ng mag-overnight stay, adunay daghang kapilian sa lugar aron inyong matagbaw ang maong gasa sa kinaiyahan.
UNSAON PAG-ADTO?
Di maguol ang mga nagplano nga molabang sa isla sa Camotes tungod kay adunay tulo ka pilianan aron kamo makasuroy sa maong lugar.
Adunay Oceanjet Fast Craft nga manukad sa Pier 1, Dakbayan sa Sugbo nga molanat sa usa ug tunga nga oras ang biyahe.
Ang Jomalia Roro nga manukad sa Danao City Port, duha ka oras nga pagbiyahe ug ang ikatulo mao ang Jomalia Fast Craft nga manukad sa Mactan Wharf, luyo nga bahin sa Island Central Mactan Mall nga gibana-bana nga usa ka oras ug 15 minutos ang pagbiyahe.
Naa usab ang Super Shuttle Ferry nga manukad sa pantalan sa lungsod sa Liloan.