Bored ka ba? Nangita ka ba og pabuhi sa dugo? Sama sa mga kulbahinam nga adventure, aniay lugar nga maghatag nimo og katagbawan gawas sa pag-enjoy sa suroy-suroy dungan sa mga kalingawan nga dili nimo mahikalimtan.
Suroyon ta ang Dahilayan Adventure Park nga nahimutang sa Barangay Dahilayan, Manolo Fortich, Lalawigan sa Bukidnon.
Nasayod ka ba nga ang Dahilayan adunay labing taas nga zipline nga inyong masuwayan, giila nga ‘Asia’s Longest Dual Zipline ug anaa sab sa maong park ang labing unang Alpine coaster sa nasod?
Sa di pa nato hisgutan ang ilang adrenaline rush nga mga kalingawan, ang lokasyon gilibutan sa dagkong mga kahoy, labong nga mga tanom nga naghatag og kagaan sa paminaw ug kalinaw sab sa huna-huna taliwala sa ka-busy sa trabaho, ilabi na kon ikaw adunay gihambin nga suliran, kini mapapas kon ikaw masuroy sa maong lugar.
UNSAY NAA?
Ang maong adventure park adunay labing taas nga Dual Zipline sa nasod, nga adunay 840 metros. Ang mga mosulay sa zipline makasulay og 4,700 ka tiil nga gihabugon ibabaw sa dagat nga maghatag og aerial view sa lunhaw nga mga tanaman sa Mount Dahilayan.
Alang sa mga mahiligon sa extreme rides, aduna silay Skytower Base Jump diin masinati ang pagkahulog gikan sa usa ka 8-storey nga cell site. Kini mao ang labing taas nga parajump sa Pilipinas ug alang lamang sa mga maisugon.
Niadtong bag-ohay lang, usa ka bag-ong dugang sa park mao ang Razorback Mountain Coaster, ang pinakauna sa nasod. Sama kini sa roller coaster nga mosubay sa ilawom sa mga punuan sa pine trees ug kabukiran sa park.
Ang ubang atraksyon sa Dahilayan naglakip sa water rafting, ropes course, ug ang python roller zipride.
Kon buot mag overnight, naa usay hotel ang Dahilayan (Pinegrove Hotel) diin pwede ma book alang sa pamilya.
Aduna usab silay mapalit nga mga pagkaon ug refreshments niadtong nakuwangan sa ilang bitbit o ang wa makadala sa ilang bawon.
OPERATIONS
Abli ang ilang rides gikan sa 8 AM hangtod 4 PM. Mamahimo’ng ma kontak sa 0917-622-3204/ 0922-880-1319.
Alang sa dugang mga pangutana mamahimo'ng mo E-mail sa zipzoneinq@yahoo.com o i-message ang facebook.com/dahilayanadventurepark o tan-awon ang dahilayanadventurepark.com.