Super Suroy: Durhan White Beach Resort mohupay sa inyung stress

Super Suroy: Durhan White Beach Resort mohupay sa inyung stress

Sa mga nagpangita og lain na sab nga beach resort nga ilang kasuroyan, diri na pud ta sibog sa north-western nga bahin sa lalawigan sa Sugbo, ang Lungsod sa Tabuelan.

Ang Tabuelan gitung-an sa mga lungsod sa San Remigio sa norte nga bahin, sa silangang dapit gi-atbangan sa Tabogon, Borbon ug Sogod samtang sa habagatan mao ang munisipalidad sa Tuburan. Ang kasadpan kun ang west area nag-atubang na sa Tañon Strait.

Kon manukad sa Dakbayan sa Sugbo, molanat ngadto sa kapin sa duha ka oras nga biyahion paingon sa maong lokasyon.

ASA DAPIT?

Subay sa Antonio y De Pio Highway sa Barangay Tabunok, Tabuelan, adunay gamay nga eskena nga subayon ug mosangko ngadto sa usa sa mga sikat nga resort sa maong dapit, ang Durhan White Beach Resort.

Gihulagway nga ‘serene escape’ ang Durhan gikan sa kasaba ug ka-busy sa siyudad ug labaw sa tanan makahupay sa inyong stress sa trabaho, tunghaan, balay ug uban pa.

Perfect ang Durhan White Beach Resort sa pag-recharge sa inyong kaugalingon sama sa panultion o meme nga na-uso sa social media nga: “Ayaw pagsige og trabaho, laag-laag sab panagsa.”

Si Lyn Momo, senior event manager sa Durhan, nagkanayon nga niadto lang 2019 atol sa pagbuto sa Covid-19 pandemic gi-develop pag-ayo ang resort sa tag-iya.

Nasayran nga family owned ang maong establisemento diin ang pangala’ng Durhan gikan sa apelyido nga Duran ug Hansen.

UNSAY NAA?

Gawas sa lapad nga beachfront aduna kiniy extension resort nga mao ang Virgin Island resort.

Adunay 45 rooms lakip na sa villas sa Virgin Island sa managlahi nga accommodation. Adunay good for two, three, four ug family/barkada.

Anaa say cottages ingon man tables and chairs sa kadtong mag-day use.

Gitugot sab ang camping diin mahimo'ng makadala sa inyong kaugalingong camping tent o mahimo'ng moabang.

Adunay komon nga comfort ug shower rooms nga magamit sa kadtong mga day-use guest.

Naa sab silay massage area sa gusto'ng magpamasahe sa tag-P900 sud sa usa ka oras.

Sa mga resort nga akong nasuroyan, ang Durhan lang ang akong namatikdan nga adunay kapilya nga magamit sa mga guest sa ilang spiritual upliftment, gawas sa paglingaw-lingaw.

KALINGAWAN

Gawas sa pagsawom-sawom sa tin-aw nga dagat ug pag chill-chill sa white sand beach, adunay gitanyag ang resort nga jetski, kayaking, giant volleyball, paint ball war, ingon man board games.

Adunay bar and restaurant by the beach ang Durhan nga mao ang Gazebo.

Perfect location sab ang resort sa inyong corporate events diin adunay lapad nga hawanan alang sa kalihukan sama sa team building. Mahimo sab ang mga special occasion event sama sa kasal, birthday, bunyag o anniversary celebrations.

Alang sa dugang mga pangutana sama sa room rates ug uban pa mamahimo'ng moduaw sa ilang official Facebook page Durhan White Beach Resort diin sa matag karon ug unya, adunay i-post nga promo rates nga mas barato. /

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph