Ashley Judd Alon, UV BA-Communication student / Nagsuwat, hulagway
Andam ka na ba sa labing exciting nga kasinatian sa pagsaulog sa Kalagkalag 2024? Ang mga makalilisang nga horror booths sa Sugbo giabli na alang niadtong mga isog nga mosuway.
Andama ang imong kaugalingon ug tapuka ang imong mga higala ug pamilya alang sa usa ka makahahadlok nga kasinatian nga dili nimo makalimtan!
Ang The Haunting: House of Horror sa Parkmall Mandaue City ug Carnival-themed horror booth sa Gaisano Grand Mall Mandaue North sa Basak sa samang siyudad dili lamang naghatag og excitement, apan nidalit usab og mga makahahadlok nga kasinatian alang sa mga ningsulod.
Gikan sa mga bata, tinun-an ug pamilya, nalingaw sa makalilisang nga mga tema sama sa haunted mansions ug creepy carnivals.
Matod sa usa ka Facebook post sa Mandaue City Public Information Office, ang House of Horror sa Parkmall gibase sa popular nga pelikulang “The Haunting” nga nag-focus sa usa ka haunted mansion nga adunay dark secret.
Sa pikas bahin, ang Grand Carnival sa Gaisano Grand Malls nagpasundayag og mga panghadlok pinaagi sa ilahang sinister clown-filled attraction, nga makita usab sa ilang ubang branches sa Visayas.
Kadaghanan sa mga tinun-an gikan sa Cabancalan National High School ug Cebu Normal University ningsaksi, nga tungod sa kahadlok, sila nalingaw kaayo sa ilang kasinatian sa Parkmall.
Si Gwenaelle Ruiz, 2nd year high school student, niingon nga “Hadlok kaayo kay bisan akong kauban kay mohilak na.” Samtang ang iyahang mga klasmet, kaduha na nga ningbalik sa booth kay giganahan.
Giablihan ang “The Haunting sa Parkmall” niadtong Oktubre 5 , samtang ang “Grand Carnival sa Gaisano Grand Malls” niadtong Oktubre 14.
Ang horror booths magpadayon hangtod sa Nobiyembre 3, 2024, human sa Kalagkalag. Adunay entrance fee nga 50 pesos sa Parkmall diin magsugod sa ala 1:00 sa hapon hangtod sa alas 9:00 sa gabii samtang sa Gaisano Grand Mall dunay pulta nga 25-30 pesos nga abli sugod alas 10:00 sa buntag hangtod sa alas 7:30 sa gabii, depende sa adlaw.
Sugdi na ang imong Kalagkalag adventure ug sulayi ang labing daghan nga makapakuyaw nga kasinatian karong tuiga! /