Kon manukad sa Cagayan De Oro City, gibana-bana nga molanat og dul-an sa duha ka mga oras nga biyahe paingon sa kinapusurang bahin sa Iligan City.
Ang maong siyudad nahimutang sa amihanang bahin sa Mindanao nga gihulagway nga usa ka destinasyon nga adunay kombinasyon sa natural nga katahum sa kinaiyahan ug lamian nga pagkaon o delicacies.
Giila ang siyudad nga “City of Majestic Waterfalls” nga nagtanyag og makatagbaw nga adventure dili lang sa mga lokal, apil na sa langyaw nga mga turista.
Kon mosuroy ka sa sentro nga bahin sa Iligan City, naa nahimutang ang plaza nga nailang landmark. Dinhi pa lang, matilawan na sa mga dumuduong ang nagkadaiyang Halal nga mga potahe sama sa pater ug inasal nga manok.
Kini tungod kay daghang kaigsuonang mga Muslim ang nanimuyo sa maong dapit.
PASALUBONG
Ang pagbisita sa Iligan City dili kompleto kon wa’y sampol sa ilang labing inila nga delicacies: Cheding’s Peanuts ug ang Sukang Pinakurat, perfect sa inyong pasalubong sa inyong pagpauli.
Duol sa Chedings Peanuts ang Senador Tomas Ll. Cabili obelisk.
Ang obelisk nahimutang sa rotunda nga gipahinungod sa kanhi senador nga usa ka Iliganon nga nalakip sa pagkamatay sa dihang nahagsa ang eroplano nga giluwanan ni kanhi Presidente Ramon Magsaysay niadtong 1957.
Si Cabili maoy mipaluyo ug instrumento hinungdan nga nahimo’ng siyudad ang Iligan niadtong 1950.
Apan ang highlight sa Iligan City nahimutang sa abunda nga natural wonders nga duol ra sa sentro-kini ang makapahinganghang mga busay o waterfalls.
BUSAY
Ang pipila sa labing inila nga mga busay nga dali ma-access alang sa usa ka adlaw nga pagbiyahe naglakip sa iconic nga Maria Cristina Falls ug madanihon nga Tinago Falls.
Aduna usab kini old springs sama sa Timoga Spring pool ug El Lauriento Swimming Pools nga dagsaan sa mga pamilya, barkada, o ka-trabaho ilabi na sa weekends.
Sa mga mahiligon sa nature adventure, dungani og food trip ang Iligan City kay perfect niini.
Kon makahigayon og biyahe sa amihanang bahin sa Mindanao, ayaw’g sipyata ang pagduaw sa Iligan.