GERWIN VIC E. BHUYO / Bangkok, Thailand Nagsuwat, hulagway
Namungingi sa mabulokon nga kahayag ang Bangkok, Thailand niadtong Hunyo 1, 2025, sa pagsaulog sa Pride Month.
Sa tunga-tunga sa kainit sa adlaw, ang sentro sa siyudad nabanigan sa kolor sa bangaw—timaan sa dakong kalipay ug panaghiusa, samtang gipahigayon ang kinadak-ang Pride Parade nga natala sa kasaysayan sa Thailand.
Nagsugod ang parada sa National Stadium ug nisubay sa mga nailhang suroyanan sa siyudad sama sa Bangkok Art and Culture Center, Siam Discovery, Siam Paragon, ug Wat Pathum Wanaram. Natapos kini sa Ratchaprasong Intersection, duol sa Central World.
Dul-an sa tulo ka kilometro ang gilay-on sa parada nga gisugdan sa hapon ug natapos sa gabii, isip pagpasidungog sa makasaysayang pag-aprobar sa balaod alang sa Same-Sex Marriage niadtong Enero nga naghimo sa Thailand nga unang nasod sa Southeast Asia nga nag-legalize niini.
Si Prime Minister Paetongtarn Shinawatra nisalmot sa parada uban sa pipila ka mga ministro sa gabinete ug mga representante gikan sa lainlaing ahensiya sa gobiyerno, pribadong sektor, ug mga civil society groups sa ikatulong edisyon sa kalihukan.
Gipahimangnoan sa punong ministro nga ang Hunyo usa ka bulan sa makiangayon ug kagawasan sa pagpili diin ang tanan adunay katungod sa patas nga pag-ila sa ilang mga katungod, kagawasan, ug pagkatawo.
Ubos sa temang “Born This Way,” gipakita sa parada ang pito ka tematikong floats nga nagpunting sa lainlaing isyu sama sa gugma ug kaangayan sa kaminyuon, akses sa kahimsog sa panlawas, ug kasayoran sa kalikupan.
Kapin sa 300,000 ka mga miyembro ang ningsalmot, nagpasigarbo sa ilang identidad pinaagi sa makapasilaw nga mga sapot uban sa ilang mga hinigugma, ug uban pang mga iladong personalidad.
Giila sab sa parada ang halangdong pagdala sa kinatas-ang rainbow flag nga lapas sa 200 metro isip simbolo sa garbo, panaghiusa, ug Love Wins! /