Jaypee Lao / Nagsuwat, hulagway
Nasayod ba mo nga sa umaabot nga mga adlaw, aduna na unyay labing dako nga events place ug nahisusama sa usa ka mountain resort nga magbukas sa tunga-tungang bahin sa isla sa Bantayan?
Gawas sa mga nindot kaayong beach resorts ug kadagatan sa Santa Fe, nangita sab ang kadaghanan kanato og linahi nga pag-explore sa atong mother nature.
Ang Man Liling sayon ra kaayo tultulon sanglit anaa man gyud kini nagpahipi sa highway sa Kangkaibe, usa sa labing dakong baranggay sa lungsod sa Bantayan.
Gikan sa Santa Fe, molanat lang og 15 minutos ang pagbiyahe.
Maka-relax gyud ka sa kaanindot sa iyang ambiance.
Present sab kaayo ang dagkong mga punoan sa kahoy, forest feels kumbaga.
Aduna sab silay mga room sa gustong mag-overnight dinhi puhon.
Aesthetics sab kaayo ang ilang mga adorno nga mas magpaanindot sa imong pagpuyo sa maong lugar.
Daghan sila’g mga ATV ug pinaagi niini, mahimo kaayo ninyong i-explore ang maanindot kaayong lima ka ektarya nga Man Liling!
Apan ang usa sa labing highlights sa maong lugar mao ang ilang Captain’s Hall Event Center nga mo-accommodate og kapin 1,000 ka mga indibidwal.
Usa kini siya ka function center nga pwedeng modawat og dinaghan nga mga bisita.
Mao nga kon daghan kaayo mog guests sa inyong kasal, birthday party or reunion pohon, masu’d kaayo mo dinhing tanan.
Classy, elegant ug aesthetic ang approach sa maong lugar, labaw sa tanan, hamugaway kaayo.
Sa panahon sa kilomkilom, mas ma-appreciate pa gyud nimo ang kaanindot niini sanglit patagsaay na man og siga ang mga adorno sa suga nga maoy maghatag og maanindot nga kahayag sa dapit. /