Di palang dugay dihang gibuksan pagbalik sa publiko ang 360 panoramic view ug iconic nga laaganan sa Sugbo nga TOPS.
Ang old-meets-new nga desinyo sa TOPS mas gipalapdan pa ug mas gipanindot aron mamahimo kini nga hamugaway alang sa tanang Sugbuanon ug sa mga turista.
Pebrero 14, Valentine’s Day dihang nag-soft opening ang TOPS aron ipakita na sa mga Sugbuanon ang mga kabag-ohan nga gihimo atol sa nakalabay nga kapin tuig nga kini gi-renovate.
The Circle at TOPS...
Mao kini ang main viewpoint sa TOPS diin dinhi sagad magtapok ang mobisita sa maong dapit aron makakita sa view sa syudad.
Kon mobisita na kamo sa renovated nga TOPS, mas gipalapdan pa kini apan nagpabilin ang mga arko, hexagonal tile patterns niini ug naa na kini 5-storey building.
Karon mas gipamoderno usab ang TOPS, anaa na kini CCTV cameras ug bukas kini 24/7.
Mas daghang kan-anan...
Karon nga anaa na’y 5-storey building ang TOPS, mas daghang kapilian nga kan-anan ang gibutang sa unang duha ka andana niini.
Naglakip kini sa mga sikat nga mga kan-anan sa Sugbo gikan sa coffee shops, restos nga nagninda sa sikat nga Cebu Lechon, snack bars, milk tea shop, pizza houses, ug uban pa!
Gikan sa Filipino cuisine, ngadto sa international cuisine, aduna’y nagkadaiyang mga klase-klase sa kan-anan ang mamahimong masuwayan sa TOPS.
Event space, viewing deck...
Sa padayon nga gitukod nga 5-storey building sa TOPS, ang 3rd floor niini gihimo na nga event space diin mamahimo nga buhaton diri ang mga nagkadaiyang pribado nga event.
Samtang mamahimo na unya nga dugang viewing decks ang 4th ug 5th floor diin mas makita pa gyud ang 360 panoramic view sa Sugbo gikan sa bukiran nga bahin, sa syudad nga bahin, ug ang kadagatan nga nagpalibot niini.
But wait theres more, sa viewing decks, mamahimo na nga kandaduhan sa nagkadaiyang magtiayon o manag-uyab ang ilahang panaghigugmaay sa ilusad unya nga Promise Locks, sosyal!
Hostel, transpo, parking...
Overnight sa TOPS? Mamahimo na unya kining posible kon mahuman na ang kasamtangan nga gitukod nga Hostel Honeycomb. Usa kini ka premium hostel nga aduna’y moderno ug first-rate nga amenities.
Walay kasakyan paingon sa TOPS? Dili na kana problema karon! Tungod kay aduna na’y service nga mamahimong kasakyan gikan sa Cebu IT Park paingon sa TOPS ug pabalik.
And of course, abli na usab ang 8-storey parking building sa TOPS nga makaakomodar og mokabat 800 ka mga sakyanan.
Tinuod gyud nga ang TOPS, a moment in every view.
Unang natukod ang TOPS o The Top/Tops Lookout kaniadto sa tuig 1985. Ang kompanya nga Fifth Avenue Property Development Corporation ug EMRO Holdings, Inc., na ang nag-manage niini karon.
IMPORTANT FEES
ENTRANCE FEE: P100 (Nagpabilin kini sa kaniadto entrance fee)
PARKING FEE: P50 (4-wheel vehicle), P30 (motorcycle)
TOPS BUS: P200 (Lakip na entrance, back & forth)
Unsaon pag-adto?
Public transport: Mamahimong mosakay og jeep paingon sa JY Square sa Lahug susama sa 04L o 04H. Pwede usab ang taxi.
Anaay mga habal-habal o motortaxi kon preferred kini apan mas mahal kini itandi sa bus sa TOPS. Anaa sa P100 ang pangayo sa driver, one-way rani.
Laing option ang TOPS bus nga anaa sa CITP, magsugod ang operation niini matag alas 7:00 sa buntag ug last trip gikan sa TOPS kay alas 3:00 sa kaadlawon.
Private transport: Mamahimo kining i Waze o Google Maps ug pangitaa lang ang TOPS. /