Gemma H. Tangoan / Nagsuwat
Bisan og nag-uwanuwan, sagad gihapon init ug alimuot ang panahon. Ilabi na karong panahona nga init sab kaayo ang eleksyon, nindot gyud nga mangita og dapit nga hilom, layo sa kasamok, ug bugnaw ang palibot nga puno sa berde nga talan-awon. In short, mausa ka sa kinaiyahan.
Aron makaginhawa ug maka-chill gamay, nanungas mi pagbalik sa akong bana sa usa ka mountain resort sa Lungsod sa Argao - ang Coal Mountain Resort sa Brgy. Linut-od, mga 23 kilometro gikan sa sentro sa lungsod.
Nakabisita na mi sa resort kaniadtong 2017 uban among mga anak. Apan kay milabay na ang walo ka tuig, nakalimot na gyud mi sa tukmang agianan.
Nangliko mi sa eskina Brgy. Taloot gikan sa highway sakay sa among pribadong sakyanan. Gisubay namo ang kongkretong kalsada nga nitadlad sa daghang mga barangay. Ang among biyahe milungtad og usa ka oras ug 45 minutos kay nagsige pa mi og pangutana sa mga lokal kon asa dapit ang resort. Kon diretso ra unta mi, mga usa ka oras ra unta to.
Layo man, pero sulit kaayo ang kahago tungod sa katahom ug kabugnaw sa lugar. Presko ang hangin, malantaw ang nagbawod nga kabukiran ug kakahoyan gikan sa taas nga bahin sa resort. Kini nga dapit kaniadto usa ka coal mining site, hinungdan nga gitawag kini og Coal Mountain Resort nga gipanag-iya sa pamilyang Caminero.
Gawas sa pagkaminahan kaniadto, umahan sab kini sa ilang pamilya.
Affordable ang ilang mga kwarto ug pagkaon. Alang nako, ang pinakalami sa ilang menu mao ang tinolang manok, sabaw nga nag-aso nga tukma gyud sa bugnaw nga klima.
Adunay duha ka klase sa swimming pool: ang kasagarang pool sama sa ubang resort, ug ang pinalahi — ang spring-fed swimming pool. Aron makaadto sa natural nga pool, modulhog ka ug molabang sa usa ka sapa nga tabukon pinaagi sa hanging bridge nga hinimo sa kawayan nga adunay mga kable ubos para safety.
Ang spring-fed pool mga 22 ka tiil ang giladmon, apan adunay mabaw nga bahin sa daplin para sa mga dili kahibalo molangoy.
Aduna sab sila'y mini zoo, apan sa among pagbalik, ang zipline ug ang tunnel nga sauna bukas, wala na mag-operate. Bisan pa, ang kahimtang sa resort mismo naghatag na og bili sa among kahago ug gasto kay layo man, pero affordable ug relaxing.
Maayo ang pagdumala sa resort, maayong serbisyo gikan sa staff. Limpyo ang mga kwarto, ug makapili ka sa ilang mga luto. Mas makadaginot pa gyud ka kon mopili ka og non-aircon nga kwarto kay dili na man kinahanglan og aircon tungod sa kabugnaw sa dapit.
Kon nagplano ka nga mag-relax, mag-bonding sa pamilya o mga amigo apan gusto nga dili kaayo layo sa siyudad, suroy na sa Coal Mountain Resort. Maka-relax gyud ka, both physically and mentally. / Mga hulagway gikan ni Gemma H. Tangoan, Jeah Datuin ug sa Coal Mountain Resort