Jerson Ceniza / Nagsuwat
Jerson Ceniza, Nanay’s campsite FB page / hulagway
Karong panahona labina gyud nga bag-o lang nahuman ang init nga eleksyon, maanindot nga mo-relax ug magpabugnaw sa kaugalingon pinaagi sa pagsuroy ug pagpuyo sa lugar nga layo sa langas.
Wala kinahanglana nga moadto ka og mahalon nga resort, sa bukid ba o dagat, kay segurado daghan sab og tawo, langas lang gihapon.
Uso na karon ang mga camping site, mga dapit nga ang imong maaninaw mao lang ang kakahuyan, nagbawod nga mga bungtod ug kon suwerte, katubigan, sapa o dunay linaw. Wala na kinahanglana ang kongkreto ug grande nga mga istruktura.
Hilig ko og suroysuroy sakay sa akong scooter nga Honda ADV 160. Dako kaayo og bintaha kon two-wheeled ang imong sakyan sa pagsuroy kay bisan suok nga mga dapit, kaya kaayong adtuon.
Ning bag-o lang, among giduaw ang Nanay’s Campsite sa Sitio Apid, Brgy. Cantabaco, Dakbayan sa Toledo. Ang dapit dunay kakahuyan, diin ang tag-iya nipabarog og tree houses diin pwedi kang makahikyad sa imong dala nga tolda ug uban pang mga galamiton. Barato kaayo ang entrance fee nga P20 matag tawo.
Gawas sa tolda, nakahikyad sab mi sa among dala nga duyan.
Bugnaw ang dapit tungod sa dagkong mga kahoy. Mingaw kay layo sa kabalayan. Mahimo kang makaluto kon duna kay dala nga mga gamit sa kusina ug maluto nga pagkaon kay duna may gitaganang dapit nga mahimo kang makahaling og kayo.
Apan mahimo ra sab nga makapalit ka sa ilang tindahan og noodles. Mas nindot sa Biyernes hangtod sa Dominggo kay maninda ang tag-iya og batchoy. Lami kaayo ihigop og sabaw sa tugnaw nga dapit.
Duna sab silay comfort room kon gusto kang motubag sa sugo sa lawas.
Naandan sa kakahuyan nga dunay mga insekto sama sa lamok, advisable nga magdala og insect repellant.
UNSAON PAG-ADTO
Dali ra tultolon ang campsite. Mosubay ka lang sa Naga-Uling Road padulong sa Dakbayan sa Toledo. Sa imong pag-abot sa arko nga timaan sa imong pagsulod sa Toledo City, pipila ka metros sa unahan sa right side, naa ang Sitio Apid.
Subay sa kalsada diin imong maagian ang usa ka basketball court, mo-right side ka na sab subay sa kalsada nga sakaon ug mga 100 lang ang gilay-on, naa sa left side ang parking area sa campsite. Alang lang kini sa mga motorsiklo.
Kon four-wheeled imong sakyanan, mahimo rang i-park daplin sa kalsada.
Alang nako, haom ang dapit sa pamilya nga ganahan og retreat gikan sa kalangas sa urban centers.
Luwas man gud kaayo ang dapit. Nindot gani mag-overnight aron mas masinati ang hingpit nga kahilom nga nasukwahi kaayo sa urban centers. /