Nagplano ka bang magpabugnaw ug mag-relax ilabi na niining nasinate nga tumang kainit sa panahon?
Perfect ang pagsuroy-suroy ning panahuna ilabi na nga summer time, iapil sa inyong bucket list ang Leci Beach House.
Ang resort nagpahiluna sa 700 metro kuwadrado nga beach property sa Purok Balintawak, Barangay Kawit, lungsod sa Medellin, nahimutang sa amihanang bahin sa lalawigan sa Sugbo.
Diin gikan ang pangala’ng LECI? Sa pakighinabi sa Superbalita Cebu kang Ely, usa sa mga staff sa resort, iyang gibutyag nga gikan kini sa unang duha ka letra sa mga ngalan sa mga apohan sa tag-iya, Leticia ug Cipriano Corpuz.
Duha pa lang ka tuig ang resort sa dihang natukod kini niadtong Pebrero 2022.
Unsay nakalahi sa LECI Beach House sa ubang resort? Nabantang kini sa lapad ug puti nga baybayon nga pwede nga mag-sunbathing, strolling, mag-beach volleyball, camping sama sa pagbutang og tents.
Siguradong inyong ma-experience ang chillaxation human sa kakapoy o stress sa trabaho, pagtuon o paglingkawas sa inadlaw-adlaw nga gimbuhaton sa tagsa-tagsa ka balay.
ATRAKSIYON
Usa sa naghatag og atraksiyon sa maong resort kay nabantang sa baybayon ang ilang mga room accommodation.
Kon ikaw nagpahuway lang sa imong lawak, mamahimo kang magsud-ong sa gawas nga bahin diin ang imong panglantaw lahos ngadto sa lapad nga baybayon.
Mosamot ka bugnaw ang imong paminaw sa ilang native nga beach house’s rooms nga ginama sa kawayan, amakan ug nipa nga maghatag nimo og tropical vibe.
Way corkage kon magdala sa inyong kaugalingong bawon nga pagkaon, ug mainom.
Apan sa kadtong gusto og hassle free, mamahimo gihapon nga maka-order og pagkaon sa ilang ma abi-abihon nga staff.
RATES UG UBAN PA
Gisiguro sa tagdumala nga affordable ang ilang resort, gawas nga family oriented, pang-masa usab ang ilang rates nga dili kaayo sakit sa bulsa.
Sa kadtong mag-day use adunay entrance fee nga P50 sa mga hamtong, P20 sa mga bata.
Adunay cottages nga kapasilungan sa mga guest; 10 person - P1,000, 15 to 30 person – P1,500.
Sa mga buot mag-overnight stay adunay:
Sea view standard rooms, good for 2-3 persons – P2,500 Sea view concrete rooms, good for 2-3 persons – P2,700
Ang maong mga rooms airconditioned, adunay kaugalingong comfort rooms, lababo ug mga basic nga gamit sama sa tables and chairs ug labaw sa tanan adunay free breakfast for two.
Adunay sab silay paabangan nga tents:
Good for 2–3 persons, P500; 4-5 pax, P750; 5-6 pax, P1,000; ug 6-8, P1,500. Samtang kadtong adunay kaugalingong tents adunay corkage fee nga P500.
Mamahimo sab nga ipa-reserve alang sa exclusive nga paggamit sa tibuok lugar alang sa mga dagko nga kalihokan, sama sa corporate events, birthdays, wedding reception ug uban pa.
Sa mga gusto og adventure sama niadtong magbugsay bugsay sa kadagatan, adunay silay clear kayak nga paabangan nga P500 ang oras.
Aduna sab silay island hopping sa Gibitngil nga P5,000 abang sa pumpboat, paingon ug pabalik.
Alang sa dugang pangutana o inpormasyon mamahimong moduaw sa ilang official Facebook page ‘Leci Beach House.’
Tana, suroyon ta ang Leci Beach House! /