Ramon Fernandez / Nagsuwat
Ramona Fernandez, Falls View Camp Facebook page / Mga hulagway
Sa kusog ug walay hunong nga pag-uswag sa mga lungsod ug siyudad sa Pilipinas, daghang mga tawo ang nangita og dapit nga makapahayahay sa hunahuna ug kalag, bisan pa og pipila lang ka oras.
Usa ka dapit diin ang hangin presko, ang kasaba mapawong, ug ang talan-awon makapahupay sa kakapoy sa adlaw-adlaw nga paningkamot.
Sa dihang nagkasabot mi sa akong suod nga mga amiga sukad pa sa pagkabata, mga higalang sama na sa akong kaugalingong mga igsuon, wala ko magdahom nga ila kong dad-on sa usa ka lugar nga wala pa gyud nako maadtui sukad sa akong pagkabata, bisan pa man og nagdako ko sa Mindanao.
Nangahas kami og saka sa kabukiran sa Brgy. Tinindugan, Lungsod sa Sergio OsmeƱa Sr., Zamboanga del Norte. Among gisuroy ang Falls View Camp, usa ka dapit nga ilado sa mga mahilig sa gawasnon nga kalingawan ug sa mga gusto mobiya sa kasamok sa dakbayan.
Gitawag kini og Falls View Camp kay imong malantaw ang usa ka falls sa pikas bukid.
Pag-abot namo, gipugngan ko ang akong pagginhawa. Sa akong atubangan, nahingangha ko sa katahom sa kalibutan nga sagad natago sa atong mga mata tungod sa kalangas ug kalibog sa siyudad. Ang mga bukid nga nagasabwag sa ilang kaberde sa tanang direksyon, ang panganod nga mohaplit og kalit sa ibabaw, ug ang tingog sa kinaiyahan, nanghupay sa akong galamhan.
May lugar sila nga gitagana alang sa mga gustong magbutang og tolda diin mahimo kang magpabilin hangtod sa pagkabuntag. Didto nimo masinati ang kahilom sa kagabhion ug ang pagbangon nimo nga imong masud-ong ang katahom sa kinaiyahan sa buntag.
Mahimo ka ra sab nga maka-order og mga pagkaon. Naa sab silay cottages nga mahimong maabangan sa grupo.
Sa Falls View Camp, nakakaplag ko og kalinaw nga dugay nakong gipangita. Kon ganahan kang moduaw, mahimo silang ma-contact pinaagi sa ilang Facebook page. /