Bet ba ninyong ang mag-beach ning pagtapos sa tuig 2023?
Bisan layo pa ang summer, way makapugong kon inyong himuong ‘Summer in December’ ang inyong pag-enjoy sa holidays.
Usa sa inila nga destinasyon sa isla sa Camotes, nahimutang sa silanga’ng bahin sa Lalawigan sa Sugbo mao ang Santiago Beach, diin ang uban mihingalan sa maong baybayon nga ‘undiscovered beach paradise.’
Sa iyang gitas-on sa baybayon, adunay mga resort nga anaa sa palibot nga nag-atubang sa lapad nga white sand.
Ang nakanindot sa maong lugar kay usa kini ka public beach nga gidumala sa local nga kagamhanan sa San Francisco, Camotes.
Nagpasabot nga giatiman kini sa local authorities aron pagsiguro nga magpabilin nga limpyo ug luwas ang maong baybayon.
Luwas nga kaligoan sa kabataan ang Santiago Beach ug magkalingaw og duwa-duwa sa baybayon. Kon hunas mamahimong mag-strolling sa sand bar.
Sigurado malingaw sab ang mga hamtong ilabi na niadtong uban sa tibuok pamilya, barkada ug corporate group.
UNSAY NAA?
Ang Santiago Bay Beach adunay mga pasilidad nga mapahimuslan. Ang maong pasilidad gidumala sa local govt. officials ug mga gagmay nga mga negosyante.
Naglakip sa cottages, pumpboat, karaoke ug adunay water adventure sama sa salbabida, skim board ug kayak. Naa say beach volleyball, Frisbee, badminton ug uban pa.
Sa mga nangita og kaistaran, adunay duol nga mga resort diin makaabang og lawak, aduna say ubang mga resort nga adunay swimming pool nga adunay bayad.
UNSAON PAG-ADTO?
Sa mga nag-budget o kadtong way pribadong sakyanan, adunay kasakyan nga van-for-hire (Vhire) nga mobiyahe paingon sa Danao City nga molanat ngadto sa 40 minutos o usa ka oras nga biyahe depende sa dagan sa trapiko. Sa Danao Port, adunay biyahe nga barge o fast craft paingon sa isla sa Camotes. Naa say barko nga manukad sa lungsod sa Liloan, apan adto modunggo sa lungsod sa Poro.
Sa Mactan Wharf sa Barangay Pusok, Lapu-Lapu City adunay ferry nga mobiyahe sab sa isla.
Sa pagdunggo sa Consuelo Port, San Francisco, Camotes adunay dyip ug habalhabal nga nagparada nga inyong kasakyan paingon sa Santiago Bay Beach.