Maka-stress ang kinabuhi sa urban nga mga dapit tungod sa kalangas gumikan sa kadaghan sa mga tawo ug mga sakyanan. Magpadulong ka pa gani sa trabaho, na-stress ka na sa dalan. Busa ang gipangita karon sa mga tawo labina sa batan-on nga henerasyon, mao ang dapit diin sila maka-chillax kay hilom ug presko ang hangin.
Kon naa ka sa Metro Cebu labina gyud kon taga Dakbayan sa Sugbo, dili ka na kinahanglan nga moadto pa og layo. Wala sab kinahanglana nga mogasto o mobayad og dako sa imong pagpuyo.
Sa Sityo Lamakan, Brgy. Babag 1, bukiran sa Dakbayan sa Sugbo, dunay usa ka padayon pang gitrabaho nga camping area nga nagtanyag og talagsaon nga kasinatian sa gusto og malinawon nga dapit ug layo sa kagahob sa siyudad.
Bisan wala pa nag-operate, ang Taytay Busay nagpapuyo na sa mga tawo nga gusto og camping.
Si Pedi Suico nga nagdumala sa dapit, niingon nga nagpadayon pa ang ilang pagtrabaho apan nanawat na sila og mga tawo nga gusto og camping aron dunay magamit sa maintenance, seguridad, tubig ug uban pang mga gikinahanglan.
Hinay ang ilang pagpalambo busa sila nabalaka nga mangadaut lang ang mga istruktura ug abusohan kini busa samtang gitrabaho pa, ila unang gipapuy-an sa gusting mopuyo.
FARM UNTA
Matod ni Suico sa interbyu sa Superbalita Cebu, farm lang unta ang tumong sa tag-iya sa luna. Nagtukod sila og usa ka payag aron dunay mapahulayan kon mananom ug mangani.
Apan duna may mga tawo nga nangita og camping area, nakahunahuna sila pagbutang og lain nga payag. Hangtod nga nagkadaghan ang nanuaw sa dapit kay lahi ang iyang palibot. Bugnaw, mingaw, nag-umbaw sa bukid, ug pulos berde ang makita.
Sa pagkakaron, duna na silay walo ka gagmay nga mga payag nga duna say open ug usa ka dako nga close type. Naa silay mga tolda nga gipaabangan sa tag P200 ngadto sa P450.
Ang dako nga payag ilang papuy-an alang lang sa labing minos 10 ka mga tawo kay giisip kini nilang barkadahan room. Tagpila ra ang matag tawo? Motuo ka sa di, P100 ra, nga matod ni Suico nga “environmental fee” kini nga gigamit nila sa tanang panginahanglan apil na ang sweldo sa ilang mga tawo.
“Wala pa mi ga-operate pero nanawat mi og mopuyo aron sab naa mi magasto sa maintenance aning lugara samtang nagsige pa mi og develop,” pagpasabot ni Suico.
“Usahay magtapal pa mi sa gasto sa maintenance.”
Sagad sa mga namuyo mga tawo nga gusto og mingaw ug ang uban mga trabahante sa call centers.
Matod niya, polisiya nila nga nagdili sa videoke, paglangaslangas sa gabii ug pagpataka og labay ug pagbiya sa basura.
Sa gustong magkape o magpaluto, mahimo rang mopahibawo sa in-charge sa lugar. Mahimo ra sab kaayo nga magdala o magluto og pagkaon.
Karon, libre ang parking sa mga motorsiklo ug ang four-wheeled maka-park sa tag P50 sa overnight sa dapit nga duol ra sab kaayo sa ilang camp site.
Sa dugang nga kasayuran, naa silay Facebook page nga Tagaytay Busay. /