Super Suroy: Trending nga Suroyanan; Bohol’s man-made forest

Super Suroy: Trending nga Suroyanan; Bohol’s man-made forest

Dili masukod ang akong kalipay nga nakasuroy pagbalik sa Lalawigan sa Bohol human sa pipilia ka mga katuigan nga wala ko nakaari tungod sa kadaghang kakulian. Lahi mangyud ning naa na tay trabaho kay panginabuhi aron mabuhi naman jud ang akoang gihunahuna.

Dako sad nakog pasalamat sa kadagkuhan sa Department of Education (DepEd) especially sa Mandaue City Division nga gipangulohan ni Dr. Bianito A. Dagatan ang amoang Schools Division Superintendent kay gihatagan kami nilag panahon nga maka-relax ug ma enjoy ang 30-Day nga mandatory vacation sa mga magtutudlo ug wala gayud nako pakyasa ang kahigayonan nga makasuroy gayud sa mga lugar nga wala pa nako naadtuan.

Sa 12 ka mga lugar nga akoang nasuroyan, usa gayud sa dili nako makalimtan mao ang famous nga Man-Made Forest nga makita ninyo sa utlanan sa lungsod sa Loboc ug Bilar.

Kini nga Man-Made Forest may kalapdong nga duha ka kilometro nga bagang kalasangan nga gama sa mga punoan sa mahogany ug kabahin kini sa reforestation project kapin na sa 50 ka tuig ang milabay.

Pagkanaog nako sa motor, namangha ko sa labihang kanindot sa lugar. Mura mangud kag naa sa laing planeta ba kay imagine, gipalibot kag green kaayo nga lugar, makakita kag mga punoan sa kahoy nga nagtindog nga malig-on kaayo, mga dahon niini nga naghatag og preskong hangin sa tanang mibisita sa lugar og labaw sa tanan, makasinati kag relaxation taliwala sa kapait nga atong nasinatian sa atong kinabuhi, makaingon gyud kag aduna gayoy paglaom ug makasiyagit ka nga kining man-made forest, walay sama nga kalasangan.

ISLAND GETAWAY

Kung gikan ka diris Cebu, maglukat kag ticket sa Pier 1 padung sa Tagbilaran City ang provincial capital. Gikan sa Tagbilaran kay musakay kag bus or van padung sa Bilar town nga mukabat og usa ka oras ang biyahe. Pwede sad ka mangabang og motorcycle or car og mo-drive padung sa maong destinasyon. Sa pag-abot nimo sa Bilar, pangitaa ang sign nga nagtudlo padung sa forest ug mo left turn ka dayon. Ang pagbisita sa forest kay walay bayad ug aduna kini available nga parking area para sa mga turista.

AMENITIES & ACTIVITIES

Ang main jud nimo nga masinati dinhi ang kanang gipalibotan kas nature. Ang mahogany trees kay makahatag gyud nimo og nindot nga backdrop sa imong pagpapicture diin usahay makuha pud ang mga kahayag og shadows sa dalan nga mao usab ang usa sa akoang nasinati pag-anhi nako.

Pwede sad ka magtuon mahitungod sa science labina ning Flora and Fauna sa ecosystem. Kung interesado sad ka sa Botany or ecology, maka-observe sad kag nagkalin lain nga mga plants, insects ug langgam nga imong ma­kit-an dinhi.

Sa mga kaslonon nganha nga nangitag lugar para sa ilang pre nuptials photo shoot, ayaw nagduha duha nganha ari na apan kinahanglan ka makig-alayon sa Local Government Unit alang sa imohang safety sa pagphotoshoot. Gani, kini pud nga lugar matud pa sa akong nakahinabi ngadto, pwede sad ni shootingan sa movies kung aduna may mga directors or producers nga gusto mohimog salida.

Ang kalapdon sa lugar pwede kaayo nga ari ka mag jogging, ug gusto sad ka magmeditation, the best pud ni nga lugar para kanimo.

Sa kinatibuk-an gayud, ako nagpasalamat sa Ginoo tungod sa man-made forest nga para nako, wala gayoy susama kanindot. /

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph