Garry Jones Cabotaje / Nagsuwat, hulagway
Sukadmasukad wala ko magdahom nga maduaw nako ang Sweden, usa sa mga modern kaayong nasod sa Europe.
Apan nahitabo ni tungod kay giimbitar mi ni Rose sa among anak nga si Princess Rosery sa pagtambong sa iyang graduation sa Doctoral Degree in Chemistry Major in Molecular Biomimetics sa Uppsala University sa Uppsala, Sweden.
Ang publikong unibersidad natukod niadtong 1477, naghimo niining labing karaan nga unibersidad sa Sweden. Gipahigayon ang graduation sa Mayo 23, 2025, apan kay sayo mi nangabot ni Rose, nakahigayon mi sa pagsuroy uban kang Princess.
Pipila sa among giduaw ang Stortorget (Grand Square), public square sa Gamla Stan sa Stockholm. Mao ni ang labing karaan nga square sa Stockholm, usa ka makasaysayanon nga dapit. Karong mga panahuna giduaw ang square sa liboan ka mga turista matag tuig.
Lain namong giduaw mao ang Stockholm Palace, opisyal nga pinuy-anan ug major royal palace sa Swedish monarch.
Nihapit sab mi sa Nobel Prize Museum, Riksplan Park ug Stockholm waterfront nga dili matukib ang kaanindot. Makapanghupaw ug makatuaw ka sa kaanindot sa dapit.
Nahibalo ka ba nga ang Abba, usa ka sikat nga Swedish pop group, kinsang awit nga Mama Mia, maoy gihimong ulohan sa duha ka mga pelikula sa samang ulohan? Busa, kay naa na man gyud mi sa Sweden, among giapil pagduaw ang ABBA The Museum.
Makita sulod sa Museum ang mga senina sa Abba nga ilang gipangsul-ob sa ilang stage performances, artefacts, concert footage, interview ug uban pa. Didto namo nakita ang kinabuhi sa Abba nga usa sa akong gipaminaw sukad pa kaniadto.
Gikan sa Sweden, ning pagsuwat, gidala mi sa among anak sa Paris, France, apan lain na sab ning sugilanon sa Super Suroy. /