Giila nga tig-supply og party drugs (Ecstasy) sa mga turista sa Dakbayan sa Sugbo ang malampuson nga nasikop sa mga sakop sa Regional Police Drug Enforcement Unit (RPDEU)-7.
Ang maong organisasyon nilusad og buy-bust niadtong Sabado, Mayo 24, 2025 sa President Roxas Street, Barangay Kasambagan, Dakbayan sa Sugbo.
Ang dinakpan gitago sa alyas nga Arjay, 21, residente sa Bayswater Mactan, Dakbayan sa Lapu-Lapu.
Si Arjay nasakmitan og duha ka tabletas nga party drugs nga mokantidad ngadto sa P4,000 ug laing upat ka putos nga adunay sulod nga gituohang shabu nga mokabat ngadto sa P100,000.
Lakip sa nakuha ang usa ka kutsarita nga kolor gold nga gituohan nga maoy gamiton sa higayon nga mohingos og cocaine.
Nakuha sab ang duha ka marijuana rolling paper, usa ka color gold marijuana grinder ug ang SUV nga sakyanan nga gamit paghatod sa mga illegal nga drugas sa higayon nga aduna siyay ika-transact.
Sigun sa usa sa mga personnel sa RPDEU 7 nga usa ka buwan nila nga na monitor ang suspetsado human migawas ang iyang pangalan nga maoy tig-supply og party drugs sa mga local ug foreign tourist sa higayon nga mosulod og mga night clubs sa Dakbayan sa Sugbo.
Tinubdan sa inpormasyon sa kapulisan kadtongusa sa ilang dinakpan sa miaging buwan nga nalambigit sa illegal nga drugas maoy nibutyag ug niila sa mga tigbaligya o tig-supply sa maong matang sa drugas.
Sagad sa mga kliyente o kustomer ni Arjay gawas sa mga turista, mga adunahan nga batan-on nga tiggamitan sa maong matang sa drugas.
Nasuta sab nga ang area og distribution sa dinakpan ang tibuok Lalawigan sa Sugbo. / AYB