‘Supplier sa durugista piniriso’ sa Cebu City Jail

‘Supplier sa durugista piniriso’ sa Cebu City Jail
DRUG DEN: Lain na sab nga drug den ang nabungkag sa Philippine Drug Enforcement Agency (PDEA 7) sa ilang pagronda sa usa ka dapit sa Brgy. Calamba, Dakbayan sa Sugbo sa Miyerkules sa hapon, Hulyo 3, 2024. / TAMPO SA PDEA 7

Giila nga high value individual, kinsang supplier giingong binilanggo sa Cebu City Jail, nadakpan sa gilusad nga buy-bust sa mga sakop sa City Drug Enforcement Unit sa Cebu City Police Office (CCPO) sa pagpangulo ni Police Maj. Jonathan Bethooven Taneo alas 10:10 sa Martes sa gabii, Hulyo 2, 2024 sa Brgy. Duljo Fatima, Dakbayan sa Sugbo.

Ang suspek giila lang nga si alyas Winston, 41, residente sa Sitio May Flower, Spolarium St., Brgy. Duljo Fatima, Siyudad sa Sugbo.

Nakuha sa mga operatiba ang 403 gramos nga gituohang shabu nga dunay standard drug price (SDP) nga P2,740,400.

Matod ni Taneo nga gipaubos nila sa duha ka buwan nga monitoring si Winston human nigawas ang iyang ngalan sa ilang nanglabay nga anti-drug operations nga siya ang tinubdan sa supply sa ilegal nga drugas.

Base sa ilang nakuha nga kasayuran nga siya ang hulgan og supply sa usa ka bodegero nga nailhan na usab nila.

Ang bodegero makadawat og tag duha ngadto sa lima ka kilo matag semana diin hagbungan siya og usa ka kilo.

Mao usab ang iyang i-repack nga maoy iyang ipang apud-apud sa iyang mga drug dealer sa ubos.

“Tagaan na siya og usa ka kilo, iyahang buk-on depende sa type of order sa lainlain nga disposer. Mao tong naa siya’y tag 25 grams ug naa sad siya’y tag 5 grams para og naay mo order, motawag sa iyaha or sa iyahang amo sa Kalunasan (city jail). Mo ready na iya na lang na ihatag,” butyag ni Taneo.

DRUG DEN

Lima ka mga tawo nangadakpan sa mga operatiba sa Philippine Drug Enforcement Agency 7 (PDEA 7) uban sa Sawang Calero Police Station atol sa pagronda sa usa ka drug den nga nahimutang sa Quijano Compound, Brgy. Calamba, Dakbayan sa Sugbo alas 3:29 sa Miyerkules sa hapon, Hulyo 3, 2024.

Target sa anti-illegal drug operation mao ang giingong drug den maintainer nga giila nga si Joel Parame, 49, nagpuyo ra usab sa lugar.

Lakip sa nadakpan ang upat ka mga lalaki nga naabtan sa sulod sa suyopanan nga sila si Jurich Catillo, 19, usa ka dishwasher sa usa ka kan-anan; Ace Gonzales, 24; Alex Batulan, 47; ug John Lloyd Algabre, 22.

Nasakmit gikan sa mga suspek ang lima ka mga pakete sa gituohang shabu nga motimbang og 12 gramos nga dunay balor nga P81,600, buy-bust money ug nagkalainlaing drug paraphernalia.

Matod ni Leia Alacantara, information officer sa PDEA 7, duha ka buwan nila nga gipaubos sa case buildup si Parame human nadawat ang impormasyon gikan sa kasaligang tinubdan.

Giingong makabaligya si Parame og 20 gramos matag semana gikan sa iyang supplier sa gidiling drugas.

Si Parame nadakpan na niadtong 2016 sa kaso gihapon sa ilegal nga drugas apan nakagawas human ni plea bargain sa iyang kaso nga giatubang.

Kalapasan sa Section 5 ug 11, Article II sa RA 9165 kun Comprehensive Dangerous Drugs Act of 2002 ang ipasaka batok sa mga suspek. /

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph