Supply sa tubig sa MCWD mas molambo

MCWD building
MCWD buildingGoogle Street View

Gipanglantawan nga mas molambo pa ang supply sa tubig subay sa bag-o lang nahuman nga manual desilting sa infiltration basin nga gipasiugdahan sa Metropolitan Cebu Water District (MCWD) sa pasilidad niini nga nahimutang sa Barangay Jaclupan, Dakbayan sa Talisay.

Gipahibawo sa buhatan nga gawas sa desilting gibuksan usab niini ang sluice gates sa sedimentation basin.

Sukad sa Mayo 2024 nagtinabangay ang mga miyembro sa Board of Directors ug uban pang mga empleyado sa MCWD lakip ang mga personnel sa Watermatic Phils., Manila Water Philippine Ventures Inc. aron mopahigayon og manual desilting sa infiltration basin niini.

Sa nasayran, tungod sa nasinati nga El Niño phenomenon, niuga ang tibuok pasilidad sa Jaclupan.

Hinungdan nga gihimo niining kahigayunan sa buhatan nga tangtangon ang gibana-bana nga 4, 000 cubic meters sa mga niuga nga lapok ug silt, lakip ang mga tanom sa infiltration basin, aron mas masudlan og daghang tubig ang facility atol sa pagsugod na sa ting-uwan.

Human sa uwahing desilting activity sa buhatan sa Hunyo 18, gibuksan ang sluice gates aron makaagas ang tubig sa infiltration basin.

Modagayday kini sa aquifer nga kuhaan sa mga pumping wells sa reservoir sa Barangay Lagtang.

Si Cebu Governor Gwendolyn Garcia, sa iyang bahin,una na nga mimando sa pagpahigayon usab og desilting sa sapa sa Mananga nga maoy source sa supply sa Jaclupan facility sa MCWD.

Kahinumdoman nga apektado ang supply sa Jaclupan facility tungod sa El Niño phenomenon apan human sa desilting process, gilauman ang padayong pagsaka sa supply sa tubig sa Mananga River./ ANV

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph