Usa ka prank o binuang sa construction worker ra unta nga sunugon ang ilang balay apan nadayunan hinuon kini niadtong Martes sa gabii, Enero 9, 2024, sa Sitio Hunop, Barangay Kansi, lungsod sa Tuburan.
Kini maoy alegasyon sa suspek nga si Julito Cabuyao, Jr., 24, dihang nahinabi sa Superbalita Cebu sa Huwebes, Enero 11. 2024.
Matod pa niya nga wala siyay intensiyon nga sunogon ang ilang balay human sila magkalalis sa iyang kapuyo nga si Rosemarie Tubos, 18.
Iyang gipasabot nga wala siya magselos apan nakainom niadtong higayuna gikan sa birthday sa iyang higala ug magtiwas unta sa pag-inom sa ilang balay.
Wala may sud-an kay kan-on ra ang gilung-ag sa kapuyo, naka-desider siya nga magdakop sa ilang manok kay ihawon.
Nasuko na hinuon si Rosemarie kaniya nganong mag-ihaw.
Nisamot ilang panaglalis kang Rosemarie human gipatukar niya sa iyang selpon ang usa ka music diin gisabaan ang iyang kapuyo nga matod pa, hinay unta ang tukar.
“Ako ra gud to sulti ba kanang dili gyud tinuod dala hadlok, natinuod man hinuon,” dugang ni Julieto.
Nangayo siya’g pasaylo kang Rosemarie.
Si Rosemarie, nga nahinabi sa Superbalita Cebu, nipasaylo kang Julieto tungod sa ilang dos anyos nga anak.
Si Police Lt. Col. Narciso Abapo, hepe sa Tuburan Police Station, nibutyag sa Superbalita Cebu nga ilang ipasaka gyud ang kaso’ng arson batok sa suspek.
Magdepende na lang unya sa piskaliya ang paghukom, dason ni Abapo.
Samtang, dugang niya, desisyon na lang usab unya sa kapuyo kon isibog ang kaso o ipadayon kini.