Gikompirmar sa suspek sa pagpatay kang Joel Jude Suson Unchuan, alyas “Coach Jay” nga nasuko siya sa biktima hinungdan nga iyang napatay.
Si Sonny Lumangca, 20, taga lungsod sa Clarin, Misamis Occidental apan trabahante sa Jett Construction and Electrical Supply sa Barangay Subangdaku, dakbayan sa Mandaue, nitahan sa kapulisan niadtong Biyernes, Enero 12, 2024.
Sa interview sa DyHP RMN CEBU nitug-an siya nga gi-pickup siya sa biktima sa Subangdaku sanglit aduna silay nasabutan nga sila manglaag sa lungsod sa Compostela niadtong Disyembre 29, 2023 sa gabii.
Apan giingong wala sila nadayon pag-adto sa Compostela, inay nibalik sa agi hangtod naabot sa IT Park sa siyudad sa Sugbo.
Samtang sa ilang pagbiyahe, nagsabot sila ni Coach J pagbuhat sa naandan nilang buhaton kon magkita sanglit nagkaila na sila kaniadto pa sa biktima sa 2022 sa iyang pagpanarbaho dinhi sa Sugbo.
“Ana siya nga kuwang kuno iyang kwarta kay 200 lang dili paigo,” alegasyon sa suspek.
Nialegar sab kini nga siya pa ang gibasol nganong nalangay sila ug kalas, matod pa, sa oras ug gasolina gumikan kay aduna pa siyay laing lakaw.
Dinhi, matod sa suspek, nasuko siya ug adunay nahikapan nga bakos nga gigamit niya pagtuok sa biktima hangtod nga wala na kini panimuot.
Dugang ni Lumangca nga wala na siya nasayod kon nganong nadala niya sa Inayagan sa dakbayan sa Naga ang biktima diin didto na kini napalgan nga way kinabuhi ang biktima. Siya niangkon nga dili siya kamao momaneho og sakyanan.
Giingong tungod kay nakonsensya na siya sa iyang nabuhat nga krimen, nibalik siya sa Sugbo ug gisugat sa kapulisan sa pantalan niadtong Enero 12,2024, human niuli siya sa Clarin.
Giangkon ni Lumangca nga wala silay relasyon ni ‘Coach J’ ug kutob ra sa pagchat-chat ang ilang komunikasyon ingon man magsabot sa buluhaton tali nilang duha.
Nitug-an sab siya nga Disyembre 29, 2023 niya napatay si “Coach J” ug siya ra ang nagmaneho-maneho sa sakyanan bisan iyang giangkon nga dili siya kamao mo-drive.
Nangayo’g pasaylo si Lumangca sa pamilya ni “Coach J” bisan nasayod siya nga dili siya mapasaylo niini.
Hugot ang iyang pangangkon nga nagbinugtong lang siya sa pagpatay sa biktima sukwahi sa migawas sa imbestigasyon nga duha ka mga tawo ang ninggawas sa sakyanan dihang giabandonar sa lungsod sa Liloan.