Gisikop sa National Bureau of Investigation (NBI) 7 ang giingong suspek sa multi-million peso fuel scam atol sa gipahigayong entrapment operation sa usa ka mall sa Dakbayan sa Mandaue niadtong Lunes, Agusto 3, 2026.
Ang suspek giila nga si Cruzaldo Fernandez Bastida, residente sa Barangay Cotcot, Lungsod sa Liloan.
Gihimo ang maong operasyon gumikan sa sumbong sa usa ka Ruel De Veyra kinsa nagkanayon nga nakabayad na og P5.3 milyunes nga cash niadtong Hulyo 26, 2026, alang sa pagpalit og 100,000 ka litro sa diesel.
Giingong gipasaligan si De Veyra sa kompaniya nga Eight Eleven Heavy Equipment Parts Supply nga aduna silay baligya nga baratong lana nga mokantidad lang og P53 kada litro.
"Investigations revealed that another respondent, allegedly lured the victim by claiming the supply was industrial diesel allocated for his company," matod sa NBI 7 sa Biyernes, Agusto 7, 2026.
Apan bisan pa sa maong bayad, wala gihapon gihatod ang lana sa kustomer. Inay, nangayo pa kini og dugang P575,000 tungod sa giingong kalit nga pagsaka sa presyo sa lana.
Nisanong ang biktima ug nihatag una og P100,000 nga pasiunang bayad apan wala gihapon ma-deliver ang maong suplay.
"Despite the agreement, the delivery still failed to materialize," dugang niini.
Giingong gipaningil na si De Veyra sa nahabiling bayad sa Hulyo 30, apan nangayo siya og dugang panahon aron makompleto ang kuwarta.
Sa maong mga higayon, nagpatabang si De Veyra sa NBI 7 aron imbestigaran ang kalihukan sa suspek.
Gihangyo sa biktima ang suspek nga mobayad lang siya og P400,000.
Giingong nisugot ang suspek ug nakigkita sa Agusto 3 hinungdan nga gilusad sa buhatan ang entrapment operation diin dala sa biktima ang P400,000 marked money.
Nagpaabot ang suspek sulod sa usa ka iladong coffee shop sa usa ka mall sa may A.S. Fortuna sa Dakbayan sa Mandaue dihang gihimo ang entrapment operation.
Ang suspek mag-atubang og kasong Estafa ubos sa Article 315, Par. 2(e) sa Revised Penal Code ug kalapasan sa Section 2(a) sa Batas Pambansa Blg. 33 (Illegal Trading in Petroleum). / ANV
