Nihimakak ang suspek sa pagpanglungkab sa usa ka meat shop sa Tabada Public Market, N. Bacalso Ave., Brgy. Mambaling, dakbayan sa Sugbo, alas 6:00 sa buntag, Lunes, Marso 25, 2924 nga siya ang nangawat.
Si Cyril Singson, 20, taga Brgy. Basak San Nicolas, dakbayan sa Sugbo nga nahinabi sa Superbalita Cebu, nihimakak sa pasingil nga siya ang nag ala ‘Ninja’ sa panglungkab sa meat shop subay sa nakita sa CCTV camera.
Sumala pa niya nga duna siyay mga higala nga makatestigo nga dili siya ang nakita sa CCTV camera.
Matod niya, Dominggo sa gabii, Marso 24, 2024, nag-inom siya atol sa birthday sa iyang silingan uban sa mga barkada ug hangtod sa Lunes, diha ra sa ilang panimalay natulog.
Samtang, pagka Lunes sa udto, ning-abot ang mga polis sa ilang balay ug gipangutana siya kabahin sa nahitabong lungkab.
Sa pagka alas 3:00 sa hapon sa samang adlaw, ningbalik ang mga polis ug giimbetar siya sa presinto sa kapulisan apan diretso na siya nga gidakop.
Gipasabot niya nga ‘mistaken identity’ ang nahitabo kaniya sanglit wala siyay tattoo sa kamot nga nakuha sa CCTV camera.
Wala gyud siya mangawat, dason sa suspek.
“Dili na ako sa CCTV ako na gitan-aw. Nganong ako man nga naa ra ko sa amo natulog,” dugang ni Singson.
Sumala pa niini nga nasubo siya kabahin sa pasangil ug nanghinaut nga makonsensya ang mga polis nga ningdakop kaniya.
Unang gipahibalo ni Police Major Jonathan Beethoven Taneo, hepe sa Mambaling Police nga gisubay nila ang ubang nahitabo nga pagpanglungkab sa ilang hurisdikyon. / GPL