Lalaki nga giingon sa kapulisan sa lungsod sa Dalaguete nga naa sa ilang drug list naangol sa pagpamusil niadtong Martes sa alas 7 sa gabii, Enero 30, 2024, sa Brgy. Jolomaynon, bukiran nga dapit sa mao nga lungsod.
Ang biktima giila nga si John Cloyd Arias, ulitawo, taga Barangay Balud, Dalaguete samtang ang suspek giila nga si Warren Limbaga, taga Brgy. Caliongan, Dalaguete.
Subay sa imbestigasyon sa kapulisan sa Dalaguete, ang biktima uban sa drayber sa usa ka motorsiklo niadto sa Jolomaynon aron pagpakigkita sa suspek sa wa matino nga hinungdan.
Apan sa dihang sila nagkaatubang, kalit siyang gipusil tumong sa dughan apan nakabantay siya hinungdan nga tapsing ra ang iyang igo.
Human sa human, si Arias nga samdan sa dughan nisumbong sa kapulisan bahin sa insidente apan wa na maabti ang suspek nga dali nga nakasibat.
Sa imbestigasyon, wa nisulti si Arias kon unsay transaksyon sa duha sa ila untang panagkita.
Ang hepe sa kapulisan sa Dalaguete nga si Police Maj. Clemente Ceralde Jr. nitawag sa mga sakop sa Dalaguete Municipal Disaster Risk Reduction Management Office aron pagdala sa biktima sa Bogo Argao District Hospital.
Luwas na ang kahimtang niini.
Dugang sa kapulisan, ang biktima naa sa listahan sa intelligence unit nga gipanid-an tungod sa pagkalambigit sa ilegal nga drugas sa lungsod.
Usa sa gisubay sa kapulisan ang anggulo sa pagpusil sa biktima mao ang transaksiyon sa ilegal nga drugas.