Nadakpan sa kapulisan ang usa ka 21-anyos nga pintor nga gipasanginlan'g nipusil sa usa ka 15-anyos nga lalaki sa Barangay Basak San Nicolas, Cebu City, Miyerkules sa gabii, Agusto 19, 2026.
Nailhan ang suspek nga si Adrian Salta, alyas Lester, nagpuyo sa Sityo Alegre sa maong barangay.
Sumala sa Mambaling Police Station, nahitabo ang pagpamusil mga alas 8:20 sa gabii sa kanto sa Cabreros Street ug L. Gabuya Street. Wala ra hinuon naigo ang biktima kay nakadagan palayo.
Dihadiha nadakpan si Salta kay naatlan sa nag-roving nga kapulisan sa Mambaling.
Nakuha gikan sa suspek ang usa ka armas nga walay serial number ug adunay marka nga “FA.” Aduna kini tulo ka buhing bala ug usa ka basiyo.
Kasong attempted murder ug illegal possession of firearms ang atubangon sa suspek.
Sumala ni Basak San Nicolas Barangay Captain Norman Navarro, dugay na nga gipangita sa mga tanod ang suspek kay sige siya og himo og kagubot sa dapit sanglit nalambigit siya sa pagpamusil, pagpanunggab, ug pagpangulata sukad pa sa Hulyo.
Dugang ni Navarro nga adunay estudyante sa Basak San Nicolas Community High School nga gibunalan sa suspek hangtod nga niundang sa pag-eskwela kay nahadlok.
Sa gihimo nga interogasyon, nagkanayon si Salta nga wa siyay intensyon nga patyon ang biktima. Iyang gipasabot nga gusto ra niyang hadlokon ang biktima kay iya kining gidudahan nga mao ang nidunggab sa iyang 14-anyos nga ig-agaw.
Gipanghimakak sab ni Salta nga nalambigit siya sa kagubot sa lugar, sanglit bag-o ra siya nga nipauli gikan sa Manila niadtong Mayo. / ABC