Nadakpan ang usa sa responsabli pagpatay sa Sugbuanong abogado nga si Joey Luis Wee niadtong 2020 sa Ninoy Aquino International Airport (NAIA) niadtong Huwebes, Hunyo 5, 2025.
Sa usa ka pamahayag gikan sa National Bureau of Investigation (NBI) central office nga gi-post sa ilang Facebook page, ang suspek giila nga si Manuelito Melia Camacho, naila sab nga “Monching.”
Nakuha siya human sa record check nga gisugdan sa airport police.
Si Camacho giila sa NBI isip akusado sa pagpatay kang Atty. Wee.
Bisan pa man nga gikumpirmar sa pamahayag sa NBI ang iyang status isip akusado nga dunay warrant of arrest sa murder, wala gidetalye ang iyang papel sa krimen.
Si Camacho unang nadakpan sa Police Intelligence and Investigation Division (PIID) Airport Police ubos sa ngalan nga “Jay-R Reyes” tungod sa pagpangawat, unjust vexation, ug resistance ug disobedience sa awtoridad.
Kining mga kasoha nagpabiling pending sa Pasay City.
Atol sa pagkatanggong ni Reyes giingong nagkalalis siya tali sa iyang mga kauban nga nadakpan ug nahibaw-an ang iyang tinuod nga pangalan.
Subay niini gihangyo sa pangulo sa PIID ang pagsusi sa laing kaso sa akusado ug sa tinuod nga pagkatawo niini.
Matod ni Arnel Pura, hepe sa NBI Cebu District Office nga atol sa ilang pagsusi, gikumpirmar sa pamilya ug kabanay nga ang hulagway nga gipakita kanila mao si Manuelito Melia Camacho.
Nasuta nga si Camacho adunay nag-ung-ong nga outstanding warrant of arrest sa kasong murder nga giisyu sa RTC Branch 10, Cebu City.
Kahinumdoman nga duha ka mga mamumuno ang nipusil-patay ni Wee, 51 anyos, samtang naglakaw paingon sa iyang sakyanan sa Barangay Kasambagan, Dakbayan sa Sugbo sa Nobiyembre 23, 2020.
Dugang ni Pura nga subay sa paksisusi, si Camacho maoy naghatag og kasakyan ug nag-arrange sa kapuy-an sa iyang mga kaubanan sa grupo nga giingong nipusil-patay ni Wee.
“Ang participation niya gi-charge man gud sila as conspiracy together with Palparan and one other apil sila Peralta, Layese. But as far as i could recall ang participation nila ana siya ang nag-provide sa mga sakyanan pati ang ila accomodation, ang hotel, bale isa sila ka grupo na nag-conduct sa surveillance then eventually sa katong pagpatay apil siya as a group na nagkuyog sa operation,” matod ni Pura. / CDF / ANV