Nadakpan sa gilusad nga hot pursuit operation sa Mabolo Police Station ang usa sa nagpusil-patay sa 56-anyos nga drug personality sa Ponce 1, Barangay Carreta, Siyudad sa Sugbo sa Dominggo sa kaadlawon, Agusto 10, 2025.
Ang nadakpan nga gitumbok nga gunman giila nga si Rockyneil Tubilla Catubig, 30, taga Ayala Access Road, Barangay Hipodromo, Dakbayan sa Sugbo.
Nasakmitan sab siya og usa ka para-ordnance caliber .45 pistol nga dunay 5 ka bala.
Samtang ang iyang kauban nga nailhan lang sa alyas nga Jay-R ang padayon pa nga gipangita.
Sigon sa imbestigasyon, nailhan ang gunman sa usa ka babaye nga nahinabi sa mga suspek sa wala pa ang hitabo.
Matod pa nga nangutana ang suspek kon asa ang biktima nga si Alfredo Cuervo Bernales.
Si Catubig giingong hitman sa usa ka drug personality nga maoy motira niadtong wala mobayad sa ilang utang sa ilegal nga drugas. / AYB