Suspek sa pagpusil sa Crips mitahan sa polis

MITAHAN: Si alyas Ugoy, 16, mitahan sa kapulisan sa lungsod sa Liloan, apan nanghimakak sa iyang kalambigitan sa pagpangrakrak. /
MITAHAN: Si alyas Ugoy, 16, mitahan sa kapulisan sa lungsod sa Liloan, apan nanghimakak sa iyang kalambigitan sa pagpangrakrak. / TAMPO

Nitahan sa alas 3 sa Biyernes sa hapon, May 10, 2024, sa kapulisan sa lungsod sa Liloan ang usa sa mga suspek sa pagpangrakrak sa karibal nga Crips gang sa Yati, Liloan niadtong Huwebes sa kaadlawon, nga niresulta sa kamatayon sa 16 anyos nga babaye ug pagka angol sa lain pang duha.

Ang suspek mao ang 16 anyos nga si alyas Ugoy, gikuyogan sa iyang amahan ug inahan nga taga Sitio Tagaytay, Barangay Calero, lungsod sa Liloan.

Matod ni Police Major Eric Gingoyon, hepe sa Liloan Police Station, nga unang nitahan si Ugoy sa barangay hall sa Calero human siya gitudlo sa upat ka mga suspek nga unang nadakpan sa manhunt operations sa kapulisan sa Liloan.

Ang unang nadakpan mao si alyas Nilo, 18, taga Barangay Looc, siyudad sa Danao.

Sunod nga nasikop ang managkaluha nga sila si B1 ug B2 sa Purok Malipayon, Immaculada, Brgy. Jagobiao, dakbayan sa Mandaue.

Pagka alas 4:30 sa kaadlawon sa Biyernes mao si alyas Mak-Mak, 21, taga Brgy. Calero.

Sigun sa amahan ni Ugoy nga wala moangkon ang iyang anak nga siya ang nipusil sanglit igo lang siya nga niuban sa grupo.

NANGHIMAKAK

Wala niangkon si Ugoy nga siya ang namusil, inay iyang gitudlo silang Nilo, nga naila usab nga alyas Niño, taga Looc, Danao City ug alyas Mak-Mak, taga Calero, nga maoy namusil.

Matod niya nga ang duha ra ang iyang nailhan samtang ang laing tulo nga nakamotorsiklo wa niya mailhi.

“Kana, Sir, sila rang duha akong nakit-an nga nibunot nga naka jacket. Nya gi rapid man nila pagtira. Pito mi kabuok pero duha ra ako kaila, sila ra Niño ug Mak-Mak. Wala ko kabantay kon katong uban nakapusil ba, sila ra man Mak-Mak ug Niño or Nilo,” matod ni Ugoy.

Iyang gibutyag nga niadtong Mayo 8, 2024 sa sayong gabii, giimbitar siya ni Mak-Mak nga mamista sa Mandaue.

Nagkita sila sa usa ka lugar sa Jagobiao ug pagka ala una sa kaadlawon sa Mayo 9, 2024, gipa drive siya'g motorsiklo paingon sa Liloan apan natingala siya nga dunay nagsunod niya nga tulo ka mga motorsiklo.

Pag-abot sa Yati, kalit lang sila nga nanghunong ug giingong sila si Mak-Mak ug Nilo nangrakrak.

Diha na matod pa siya gisultihan nga ang kadtong gipamusil maoy nidunggab nila niadtong Mayo 4, 2024.

“Adto na nisulti si Makmak paghuman nag tira namo. Ana siya nga bawos mi, Bay, tungod adtong gidunggab among kauban. Didto mi sa Tayud. Ana dayon siya nga i-delete nang chat nimo. Ana ko nganong i-delete man? Ana siya nga ayaw tug-an kinsa ang namusil, ana si Mak-mak. Nituo sad ko ako gi delete sad nako. Tingala ko pagpamata nako anang petsa 9, pag mata nako ala 1, akoa naman pangan nigawas hinuon. Nilahos dayon ko sa ig-agaw nako nga konsehal,” matod ni Ugoy.

KALUHA

Samtang nitugot si Rollen Monisit Obia, alyas B1, nga manganlan, usa sa kaluha nga gitudlo nga usa sa mga responsabli sa krimen. Siya nihimakak sa iyang kalambigitan.

Si Obia nadakpan uban sa iyang kaluha sa sulod sa ilang balay sa Jagobiao nianang pagka alas 2 sa kaadlawon pagka Mayo 9, 2024.

Matod niya nga dili tinuod nga apil siya sa pagpamusil kay sa maong hitabo natulog siya sa ilang balay.

Giangkon niya nga sakop siya kaniadto sa Bloods gang apan wala na moaktibo niini kay nakatutok na siya sa pagpamuhi og manok igtatari.

“Nganong naapil man mi ana, Sir, nga nagtinarong man tawon mi uy? Sayo tawon ko natulog adtong petsa 8. Wala man gani mi manglaag adtong pista. Bisan si Mak-mak nitug-an nga wala gyud mi labot ana, Sir,” matod ni Obia.

Alang kang Gingoyon nga ila (mga suspek) nang tubagon ngadto sa korte ang ilang panghimakak sanglit duna silay mga saksi nga makatumbok ug maka tudlo kinsa kanila ang namusil.

Gidugang ni Gingoyon nga si alyas Ugoy giila nga badlungon sa ilang lugar.

Gani niangkon niini ang amahan nga gahi'g ulo ang iyang anak nga bisan unsaon sa pagbadlong dili mopatuo.

Wala na usab kini moeskwela kay gipili niya ang mag-uban-uban sa barkada nga mga sakop sa Bloods gang. /

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph