Nadakpan sa Sabado sa hapon, Abril 6, sa kapulisan sa lungsod sa Liloan ang suspek sa pagtulis ug pagpatay sa usa ka gituohang bayot nga napalgan nga patay sa sulod sa iyang lawak sa Purok Sun Flower, Brgy. Poblacion, lungsod sa Liloan alas 11:30 sa Biyernes sa gabii, Abril 5, 2024.
Ang biktima giila nga si Baltazar Go Gonzalez, 47, kinsa
nakaplagan nga duna nay pisi ang liog nga gihigot sa kilid sa iyang kama ug hubo ang ibabaw nga bahin sa lawas.
Ang biktima nagtrabaho sa Danao City Dynacast Shipbuilding & Repairs Inc.
Ang suspek nga si Mark Jeff Olivar Lujira, 18, alyas Jerome, giingon sa kapulisan nga niangkon sa krimen sa ilang pag-imbestigar human nila nasikop sulod sa usa ka mall diin ilang nasubay pinaagi sa Global Positioning System (GPS) sa cellphone sa biktima.
Matod ni Police Major Eric Gingoyon, hepe sa Liloan Police Station nga nahinabi sa Superbalita Cebu sa Sabado pinaagi sa telepuno, nga base sa pamahayag sa mga silingan nga kauban sa biktima si Lujira sa pagsulod sa balay sa wa pa ang krimen.
Sila nakadungog og singgit ni Gonzalez apan sa ilang pagsusi, sirado ang kwarto ug nahilom hinungdan nga wala ra nila panumbalinga.
Apan pipila ka minutos ang nakalabay, ilang nabantayan nga abli na ang pultahan sa kwarto ug sa ilang paglili, ilang nakita ang biktima nga way panimuot kilid sa iyang katre ug nilagom na.
Gihigot ang liog niini sa pisi samtang gibaatan usab og plastic ang ulo nga ilang gituohang hinimoan ni Lujira.
Dugang ni Gingoyon nga dunay mahalong mga butang nga gipanag-iya sa biktima nga nangawagtang na nga gituohang gidala sa suspek.
Pagka alas 2:30 sa Sabado sa hapon, ilang nadakpan si Lujira sa usa ka mall sa Barangay Poblacion, dakbayan sa Danao.
Sa lahi nga interbyo sa Superbalita Cebu, si Gingoyon nibutyag nga sa ilang pagsubay sa GPS sa cellphone, ilang natultolan ang nahimutangan sa butang sa usa ka cellshop sa tindahan sa Dakbayan sa Danao.
Kini human usab nila nasayran gikan sa usa ka caller nga gibaligya ang cellphone sa biktima.
Sa didto na sa shop ang suspek, wa una kini bayri sa babaye nga staff.
“Niingon tong tindera sa cellphone shop nga naa tay buyer ani, Sir (suspek), pero paingon pa paabuta lang. Mao to, ang suspek niadto sa kompyuteran, ni-relax. Mao to nadakpan sa atong kapulisan,” matod ni Gingoyon sa interbyo.
Gawas sa cellphone, ilang nabawi ang silver nga mga alahas nga pulseras ug kwentas sa biktima.
Wa silay nakuha nga kwarta, apan giangkon sa suspek nga nakakuha siya apan wa siya nasayod kon pila.
NAGKAILA
Si Gingoyon nagkanayon nga sa ilang pag-imbestigar kang Lujira, kini nagkanayon nga nagkaila sila ni Gonzalez niadto lang Lunes, Abril 1.
Subli silang nagkakita niadtong Biyernes, Abril 5 sa usa ka tambayanan sa lungsod sa Liloan.
“Unya gahapon (Biyernes), nagkita ni sila. Naa man guy tambayanan diri sa Liloan...gwapo man ni nga tambayan. Diri man ni sila mga alas 5 sa hapon”, dugang ni Gingoyon base sa sulti sa suspek kanila.
Giagda siya nga mobalhin sila sa usa ka bar, apan mamauli una sila aron mag-ilis ang suspek kay “bulingot na ang senina.”
Tuod man, sa dihang didto na sila balay nga gipuy-an sa biktima, naligo siya ug pagka human, hubo siya nga nigawas ug nipasangil sa biktima nga nipugos kaniya sa pakighilawas ug kiss.
“Didto na nasuko ang suspek ug iyang gituok ang biktima. Ug kadtong iyang nakita ang biktima nga hapit na mamatay, iyang gituok adtong pisi nga naa sa duyan,” asoy ni Gingoyon.
Kasong robbery with homicide ang ipasaka batok sa suspek.