Malampusong nasikop sa mga kapulisan ang usa ka suspetsadong kawatan human kini naaktohan nga miambak gikan sa atop sa usa ka dakong tindahan sa Barangay Tabunok, dakbayan sa Talisay.
Si alyas "Mark," nga giingon’g miyembro sa grupo nga gitawag og "Baklas-bubong" nadakpan sa mga nagpatrolya nga sakop sa Talisay City Police Station mga alas 2:10 sa kadlawon niadtong Hunyo 26, 2025.
Nakuhaan usab siya og dili lisensyadong armas nga dunay duha ka buhing bala, ingon man 13 ka pakete sa gituohang shabu.
Gikataho nga dihang gi-inspeksyon ang maong tindahan inabagan usab sa tag-iya, nasayran nga giguba sa suspek ang atop niini ug posibleng didto kini niagi apan nagpadayon pa ang imbestigasyon kun aduna bay nakawat nga kwarta o mga butang.
Matud sa kapulisan nga niangkon ang suspek nga nalambigit siya sa pagpanglungkab ug pagpangawat sa pipila ka mga establisemento sa Sugbo.
Ang maong suspek mag-atubang og kasong kalapasan sa Republic Act 10591, RA 9165, ug Attempted Robbery. / JDG