Usa ka sports utility vehicle (SUV) nakapangangha sa mga tawo kay giabandonar kini sa usa ka babaye sa Huwebes sa tungang gabii, Nobiyembre 23, nga nag-andar sa karsada sa Purok Sayaw, Brgy. Balirong, dakbayan sa Naga.
Ang post ni Joce Dancel Canonigo Dumcas kalabot sa sakyanan nag-viral.
Atol ning pagsuwat, sumala sa post, gi-lock ang mga pultahan sa puwa nga Ford EcoSport apan walay sulod ug gibiyaan ang sakyanan.
Matod ni Dumcas nga sa ilang pakisusi, base sa asoy sa mga saksi, nga usa ka babaye ang nagmaniho sa maong sakyanan gikan sa habagatang bahin.
Gibiyaan ang sakyanan sa maong dapit ug nisakay og laing sakyanan padulong sa siyudad sa Toledo.
Sa follow up sa Superbalita Cebu kang Police Lt. Col. William Homoc, hepe sa Naga City Police Station, nasuta nga ang maong sakyanan usa kini ka Ford EcoSport nga kolor puwa nga may plaka nga NAS 447.
Matod ni Humoc nga iya kining gipabantayan og mga barangay tanod sa Balirong aron kon may mokuha niini, mo-coordinate sa ilang buhatan aron mailhan kon mao ba kini ang nanag-iya sa sakyanan.
Hangtod sa alas 5:00 sa hapon kagahapon, Nobiyembre 24, wa pay nikuha sa sakyanan.
Matod ni Homoc nga human sa 24 oras kon walay mokuha niini, ilang subayon ang nanag-iya sa sakyanan pinaagi sa pag-abag sa Land Transportation Office (LTO).